КОНСЕРТИ ЁДБУДИ ШОҲИ ПОПИ ҶАҲОН МАЙКЛ ҶЕКСОН

Дар моҳи октябри соли ҷорӣ гурӯҳе аз аҳли хонаводаи Майкл Ҷексон бахшида барои гиромидошти ин сарояндаи попи ҷаҳон консерте барпо мекунанд, ки  қарор аст дар варзишгоҳи «Миллениум»-и шаҳри Кордифф баргузор гардад. Дар ин бора хешовандагони Майкл Ҷексон дар як нишасти хабарӣ иттилоъ доданд, хабар медиҳад сомонаи ContactMusic.

Ҳамон тавре, ки модараш Кэтрин мегӯяд, хоҳар ва бародарони ӯ Тито, Джеки, Марлон ва инчунин чандин сарояндагону ҳунармандони машҳур низ дар ин консерт ширкат меварзанд. Дар ҳоли ҳозир рӯйхати ширкаткунадагон дар он консерт эълон нашудааст. Ба гуфти хонаводаи Майкл Ҷексон дар саҳна танҳо ҳамон афроде, ки Ҷексон онҳоро дӯст медошт ва эҳтиром мекард, ҳунарнамоӣ мекунанд. Рӯйхати ширкаткунандагон дар ин маҳфил то 4-уми август мунташир хоҳад шуд. Ва дар ҳамин рӯзҳо фурӯши чиптаҳои консерт ба роҳ монда мешаванд.

Дар айни замон барои эълон ва маҳали баргузории ин консерт бархе аз дигар аъзои хонаводаи Ҷексон изҳори нороҳатӣ кардаанд ва талош доранд, ки аз барпо шудани чунин як консерт ҷилавгирӣ намоянд. 

Ба гуфтаи онҳо кори хуб нест, ки консерт дар ҳамон шабу рӯзе баргузор мегардад, ки мурофиаи муттаҳам ба қатли овозхони маъруф, доктори хонаводагии онҳо Конрад Мюрр дар Амрико оғоз мешавад.

Дар Тоҷикистон низ Майкл Ҷексон алоқамандон ва пайравони худро дорад. Овозхони маъруфи туркмантабори тоҷикистонӣ Пенҷӣ Аннаев аз ҷумлаи онҳо мебошад.

Ҷаҳонгири Султон, «Рӯзгор»