СӮХТОР ДАР БОЗОРИ ШАҲРИ ХОРУҒ

21-уми октябр соати 11- шаб дар бозори шаҳри Хоруғ сӯхтор ба амал омад. Ҳарчанд хадамоти оташнишонии шаҳр се адад мошини оташнищонӣ ва тамоми ҳайати идораро барои хомӯш кардани ин сӯхтор сафарбар карда бошад ҳам, вале ба онҳо танҳо соати 6-и субҳ муяссар шуд, ки аз идомаи сӯхтор пешгирӣ намоянд.

Тибқи маълумоти пешакӣ 18 мағоза, як анбор ва чаҳор ошхона ба куллӣ ба коми оташ рафтаанд. Ба гуфтаи оташнишонҳо оташсӯзӣ тақрибан 1 ҳазору панҷсад метрии мураббаъро фаро гирифтааст. Сабаби сар задании сӯхторро оташнишонҳо дар ба ҳам хӯрдани ноқилҳои барқӣ дар яке аз ошхонаҳо гуфтаанд. Дар бораи талафоти ҷонӣ ва хисороти молӣ ҳанӯз маълумоте ироа нашудааст.

Вале соҳиби яке аз мағозаҳо, ки нахост номашро бигирем, гуфт, ки дар мағозаи ӯ ба маблағи 120 ҳазор долллари амрикоӣ мавод ва 20 ҳазор доллар пули нақд мавҷуд будааст, ки дар ҳамин оташсӯзӣ ба куллӣ аз байн рафтаанд.

Алишер Ҷунайдов, Хоруғ, «Рӯзгор»