CӮХТОР ДАР КОРХОНАИ ПАХТАИ ҲОҶӢ АКБАР ТӮРАҶОНЗОДА

Як корхонаи пахта, воқеъ дар ноҳияи Ваҳдат, ки ба Ҳ.А.Тӯраҷонзода марбут аст, ба коми оташ рафтааст. Ин ҳодиса соати сеи шаби гузашта сурат гирифта, бар асари он ҳудуди 600 баста ё кипи 220-килоии пахта сӯхтааст. Кормандони интизомӣ дар аввалин вокуниш гуфтаанд, ки ин ҳодиса ҳадафмандона сурат гирифтааст, чун дар ҷои ҳодиса шишаи маводи сӯхт пайдо шудааст.

Дар ҳоли ҳозир мақомоти интизомӣ сабабҳои ҳодисаро таҳқиқ мекунанд. Худи Ҳоҷӣ Акбар Тӯраҷонзода, ки ин корхонаи пахта дар ноҳияи Ваҳдат ба ӯ марбут аст, гуфт, ин ҳодиса барқасдона сурат гирифтааст, вале дар бораи омилини он дар ҳоли ҳозир чизе гуфта наметавонад. Вале ӯ афзуд, агар ин ҳодиса барои монеъ шудан ба фаъолиятҳои мазҳабӣ ва сиёсии ӯ ва бародаронаш сурат гирифта бошад, талоше беҳуда аст.

Корхонаи коркарди пахта, ки дар даврони Шӯравии пешин моли давлат буд, соли 2000 ба ширкати хусусии марбут ба Ҳоҷӣ Акбар Тӯраҷонзода мубаддал гашт.