УБАЙДУЛЛОЕВ ИШТИРОКИ ХОНАНДАГОНРО ДАР МАЪРАКАҲОИ УМУМИДАВЛАТӢ ҚАТЪИЯН МАНЪ НАМУД
Маҳмадсаид Убайдуллоев, раиси шаҳри Душанбе иштироки хонандагони макотиби ҳамагонӣ ва дониҷӯёни донишгоҳҳои олиро дар маъракаҳои умумидавлатӣ, ки минбаъд дар пойтахт шаҳрдорӣ баргузор менамояд, қатъиян манъ намуд. Номбурда ин нуктаро рӯзи 23-уми август зимни мулоқоташ бо гурӯҳи фейсбукчиён иброз намуд.
Раиси шаҳри Душанбе таъкид сохт, ки маҳз иштироки хонандагон дар маъракаву ҷашнвораҳои гуногун боиси харҷи зиёд шудааст: «Мову Шумо низ падар астем, бобо астем, мебинем, ки хонандагон барои рафтан ба театр, ремонти мактаб, рӯзи таваллуди муаллимашон гуфта моҳе тақрибан аз 20 то 60 сомонӣ сарф мекунанд.
Функтсияи иҷтимоии хонанда таълим гирифтан аст, функтсияи иҷтимоии омузгор таълим додану омузондан аст». Маҳмадсаид Убайдуллоев иброз намуд, ки мутаасифона бе ин ҳам ҳоло сатҳи дониши хонандагон паст буда, онҳоро бештар ба таълиму омузиш ҷалб намудан лозим.
Раиси шаҳри Душанбе ишора намуд, ки иқдоми манъи иштироки хонандагонро дар маъракаҳое, ки бо ташабуси шаҳрдорӣ баргузор мешаванд, дар асоси пешниҳоди бархе аз иштирокчиёни гурӯҳи фейсбукчиён роҳанозӣ намудааст.
Темур Раҷабализода, «Рӯзгор»