ТОЛИБ АЙЁМБЕКОВ: "МАН ДАР ХОРУҒ ҲАСТАМ"
Яке аз раҳбарони гурӯҳҳои силоҳбадасти Хоруғ хабари боздошт ва ба Душанбе интиқол ёфтанашро рад кард.
Рӯзи 24-уми август, баъд аз пахш шудани хабари ин ки гӯиё Толиб Аёмбеков, муттаҳами аслии куштори генерал Абдулло Назаров (дар таърихи 21 июл), барои идомаи бозпурсиҳо ба Душанбе интиқол ёфтааст, ӯ бо мо ҳамсӯҳбат шуд. Вай гуфт, дар манзилаш ба сар бурда, ҳаққи тарк кардани шаҳрро надорад.
Ӯ гуфт, розӣ аст танҳо дар мавзӯи будубошаш дар Хоруғ ба саволҳои мо посух бидиҳад.
Айёмбеков: "Ман ба ҳеҷ куҷо нарафтаам, дар хона ҳастам. Ман "под подписку о невыезде" ҳастам."
-Мегуфтанд, ки замоне Шумо дар шифохона будед, Шуморо ОМОН ҳимоят мекард...
-Бале, ин рост аст. Ман рӯзи 21-ум август ҳамон санади "под подписку о невыезде"-ро имзо кардам ва бе конвой озод ҳоло дар шаҳр ҳастам.
-Шуморо ҳоло кӣ ҳимоят мекунад?
-Ман танҳо дар амони худо ҳастам.
-Баъд аз кушта шудани Имомназар Имомназаров мегӯянд, ки хатари рух додани ҳама гуна ҳодиса вуҷуд дорад. Оё Шумо худро муҳофизат карда метавонед?
-Бо дасти холӣ чӣ хел муҳофизат мекунед? Бачаҳо ҳастанд, аммо бо дасти холӣ ҳеҷ кас муҳофизат карда наметавонад. Фақат Худо ҳаст дар болои сари мо.
«Озодӣ»
