РӮНАМОИ КИТОБҲОИ МУҲАҚҚИҚОНИ ТОҶИКУ ЭРОНӢ ДАР ДУШАНБЕ

Имрӯз, 8-уми феврал, дар Китобхонаи миллии Тоҷикистон рӯнамои китобҳои илмӣ - тадқиқотии олимони тоҷику эронӣ «Синдбоднома», «Шеъри муосири Эрон», «Китобшиносии Фирдавсӣ» ва маҷаллаи «Андеша» баргузор гардид, ки дар он Сафири Ҷумҳурии исломии Эрон дар Тоҷикистон Алиасғари Шеърдӯст ва олимону нависандагони кишвар иштирок намуданд.

Дар баромаду суханрониҳои ҳозирин ба китоби «Шеъри муосири Эрон» баҳои баланд дода шуд ва зикр гардид, ки ин китоб барои муаррифӣ кардани вазъи шеъри имрӯзи Эрон ба хонандаи тоҷик бисёр муфид аст. Китоби мазкур навиштаи Алиасғари Шеърдӯст буда, дар он перомуни ҳаёту осори зиёда аз 60 шоири муосири Эрон маълумоти мукаммал оварда шудааст.

Ҳамчунин дар анҷом ба иштирокчиён шумораи нави маҷаллаи илмии «Андеша» тақдим карда шуд ва зикр гардид, ки ин ҳамоиш бо ташабуси Сафорати Ҷумҳурии Исломии Эрон ва Китобхонаи миллӣ баргузор шудааст.

«Рӯзгор»