Афғонистон ба фазо киштии кайҳонӣ мефиристад
Афғонистон мехоҳад, ки дар ҳамкорӣ бо ширкатҳои хориҷӣ ба фазо киштии кайҳонӣ фиристад. Афғонистон аз ҷумлаи кишварҳое ба шумор меравад, ки тавони фиристодани киштии кайҳонӣ ба фазоро надорад, аммо Вазорати мухобирот ва технологияи маълумотии ин кишвар ният дорад, ки ин корро дар ҳамкорӣ бо ширкатҳои хориҷӣ анҷом диҳад.
Амирзай Сангин, вазири мухобирот ва технологияи маълумотии Афғонистон, мегӯяд, се ширкати хориҷӣ эълон кардаанд, барои татбиқи ин лоиҳа, ки 300 миллион доллар ҳазина хоҳад дошт, сармоягузорӣ кунанд.
Амирзай Сангин дар суҳбати ихтисосӣ бо бахши дарии радиои «Озодӣ» гуфтааст, масъулони ин ширкатҳои алоқаманд, ки шомили ширкатҳои фаронсавӣ, шведӣ ва як ширкати муштараки Чин ва Шриланка мебошанд, барои иштирок дар маросими довталабӣ ба Кобул даъват гардидаанд.
Вай гуфтааст: «Мо ин се ширкатро барои гуфтугӯ даъват намудаем. Умедворем, ки дар зарфи як ё ду ҳафта онҳо ба Кобул мебиёянд. Ҳадафи мо ин аст, ки дар зарфи се ё чаҳор ҳафтаи оянда яке аз ширкатҳои довталабро барои амалисозии ин лоиҳа интихоб кунем.»
Ба таъкиди вазири мухобирот ва технологияи маълумотии Афғонистон, баъд аз тавофуқ бо яке аз ин ширкатҳои байналмилалӣ киштии кайҳонӣ сохта мешавад ва он баъдан ба фазо парвоз хоҳад кард.
Амирзай Сангин дар идомаи суҳбаташ гуфтааст, ки масъалаи парвози киштии кайҳонӣ ба фазо аз сӯи кобинаи ҳукумати Афғонистон тасвиб гардида, марҳилаҳои тадорукотии ин лоиҳа аз сӯи ҳукумати кишвар дар ҳоли такмил аст.
Дар ҳоле, ки шуморе аз мардуми одӣ дар Афғонистон арзиш ва аҳамияти ин иқдоми ҳукуматдоронро намедонанд, аммо мегӯянд, беҳтар аст, то ба ҷои ҷангу бадбахтӣ талошҳое ба хотири пешрафту муҷаҳҳаз шудани Афғонистон бо технологияҳои муосир сурат бигирад.
«Озодӣ»