Маҳкумият ба 3,5 соли зиндон барои ташвиқи ғояҳои ҲИУ

Додгоҳи ноҳияи Шаҳритус як ҷавони 32-солаи ин минтақаро барои узвият ва ташвиқи ғояҳои ифротгароии Ҳаракати Исломии Узбакистон, ба 3 солу шаш моҳ равонаи зиндон кард. Он гуна, ки аз додгоҳи ноҳияи Шаҳритус ба мо хабар доданд, «ин ҷавон Назрулло Аюбов, сокини ин ноҳия аст, ки ҳангоми бозгашт аз муҳоҷирати корӣ аз Русия бо худ наворҳои хусусияти ифротгароёнаро оварда ва ба ташвиқи дар миёни ҷавонони ин минтақа даст задааст.»

Ҳамчунин тафтишот аз Назрулло Аюбов, флешкаеро кашф карда ва дар телефонаш низ наворҳои ифротгароёнаро мусодира кардаанд. Таҳқиқ собит кардааст, ки вай тариқи Интернет низ мукотибаҳоеро анҷом медодааст. Зимнан, мақомоти интизомӣ ва амниятии Тоҷикистон авоили соли ҷорӣ иддае аз ҷавононро дар Шаҳритус, Қабодиёну Қусмангир боздошт карданд, ки ба узвият дар Ҳаракати Исломии Узбакистон мутаҳҳам дониста мешуданд.

Ба ин тартиб маҳкумият ба зиндони Назрулло Аюбов, нахустин муҳокимаи додгоҳии афроди боздоштшуда ба узвият дар Ҳаракати исломии Узбакистон дар минтақаи Қурғонтеппаи вилояти Хатлон дар соли ҷорӣ аст.

«Озодӣ»