Чин ба бозори матбуоти Тоҷикистон ворид мешавад

Имрӯз, ҷумъаи 31 май дар Китобхонаи миллии Тоҷикистон муаррифии маҷаллаи чинии «Контимост» баргузор гардид. Хабарнигори мо, ки дар маросими муаррифии ин маҷаллаи чинӣ ширкат дорад, гуфт, «ин маросим бо ширкати мақомоти Палатаи савдо ва саноати Тоҷикистон ва масъулони сафорати Чин дар Душанбе ва ноширони ин маҷалла сурат гирифт.»

Дар ин маросим таъкид шудааст, ки нашри ва паҳн шудани ин маҷалалаи чинӣ омили густариши ҳар чӣ бештари равобиту ҳамкориҳои Тоҷикистону Чин хоҳад гардид. Маҷалла моҳе як бор ба забони тоҷикӣ ва бо теъдоди 3 ҳазор нусха нашр мегардад, ки густаришу тақвияти равобиту ҳамкориҳои ҳамсоягии Тоҷикистону Чин дар меҳвари матолиби он қарор дорад. Масъулияти чопи ин маҷалларо Палатаи савдо ва саноати Тоҷикистон бар дӯш хоҳад дошт, аммо маблағгузории он аз сӯи Чин сурат мегирад.

Муаррифии ин маҷаллаи чинӣ дар ҳолест, ки масъалаи нашри он дар Тоҷикистон ва ба хусус бо забони чинӣ ҳанӯз як соле пеш миёни мақомоти Палатаи савдо ва саноати Тоҷикистон ва ҳайати ин маҷалла дар шаҳри Душанбе матраҳ шуда буд ва созишномаи дуҷониба низ дар ин замина ба имзо расидааст.

Ян Говэй, сардабири маҷаллаи «Контимост» ва ҳамзамон ва мудири «Нашрияи иқтисодии Шинҷон» ва муовини Анҷумани кормандони расонаи Чин гуфта буд, ки онҳо ният доранд то ҳар чӣ зудтар маҷаллаи «Контимост»-ро дар Тоҷикистон ба забони тоҷикӣ ба чоп расонанд ва онро паҳн кунанд. Ин буд, ки шумораи нахустини маҷаллаи «Контимост» бо дархости ҷониби Палатаи савдо ва саноати Тоҷикистон дар остонаи таҷлили 20- умин солгарди иҷлосияи 16-уми Шӯрои Олии Тоҷикистон нашр гардид.

Зимнан, маҷаллаи «Контимост», ки аз ҷумлаи даҳ расонаи маъруфи чинӣ дар хориҷи ин кишвар аст, бо забони русӣ дар кишварҳои Осиёи Марказӣ чоп мешавад. Бозтоби ҳаёти иқтисодӣ ва фарҳангӣ мавзӯи меҳварии ин маҷалла мебошад.То кунун ин маҷалла дар Қирғизистон чопи густарда доштааст.

«Озодӣ»