ТАНИШ ДАР БАЙНИ АДЁН БА МАНФИАТИ КИСТ?

Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Мисри Араб Муҳаммад Ҳуснӣ Муборак, барқияи таъзият ирсол дошт, ки дар он омадааст: «Ман бо тамоми ҳастӣ таркиши дар назди калисои Қиддисини  вилояти Искандария рухдодаро маҳкум намуда, ба наздикон ва хешу таборони қурбоншудагон арзи тасаллият ва ҳамдардӣ менамоям. Парвардигор диёри Миср ва мардуми онро аз ҳама гуна бадиҳо ва макрӯҳот нигаҳ дорад!».

Ба иттилоъи расонаҳо хабарӣ, 14 октябр соли 2010 ду зан аз масеҳиёни қибтӣ дар Миср дини исломро қабул карда аз насроният рӯй гардониданд. Раиси калисои қибтиҳо дар Миср Падар Шунуда, онҳоро барои бозгаштан ба дини масеҳият маҷбур ва дар калисо муҷозот кард. Ин хабар фош шуд. Шохаи гурӯҳи «Ал-Қоида» дар Ироқ хост занҳои мусалмоншударо кӯмак кунад. 2-уми ноябр ба Шунуда паём фиристод, ки он ду зани мусалмон шударо дар зарфи 48 соат озод кунад. Раиси қибтиҳо ин огоҳиро нодида гирифт.

Баъди чанд рӯз дар моҳи ноябри соли 2010  шохаи  «Ал-қоида» дар Ироқ дубора таҳдид кард, ки агар ду зани масеҳие, ки ба хотири гаравидан ба Ислом дар калисои қибтиҳо дар Миср зиндонӣ шудаанд озод нашаванд, ба ҷомеа масеҳиёни ин кишвар ҳамла хоҳад кард... Тибқи  иттилои  “euronews.net” то замони ҳамла он ду зан дар калисо муҷозот мешуданд…

Таркиш замоне рух дод, ки  масеҳиёни уртудукси қибтӣ шаби соли нави 2011 аз калисо хориҷ мешуданд. Бар асари ин таркиш 29 нафар кушта ва 71 тани дигар захм бардошт. Ин таркиш тавассути як худрави бамбгузоришуда анҷом шуд. Дар ин таркиш танҳо масеҳиёнӣ қибтӣ зарар надидаанд, балки ҳашт тан аз мусалмонон, ки дар ҷивори калисо дар масҷид будаанд ва низ чор нафари дигар аз полис  ҷароҳат бардоштанд.

Мавқеи Ал-Азҳарро нафаҳмиданд

Ба дунболи ин таркиш як гурӯҳи масеҳӣ хашмгин шуда  бо шиори «Бо хуну танамон аз салиб ҳимоят мекунем» ба масҷиде, ки дар наздикии маҳалли таркиш сохта шуда буд ҳамла карда, қисме аз китобҳои мавҷудбуда дар онро ба берун  партофтанд ва шишаҳои онро бо зарби сангпораҳо шикастанд…

Ин ҳодиса боис шуд то садҳо тан аз масеҳиён дар эътироз ба он ба хиёбонҳо бирезанд ва бо нирӯҳои амниятии ин кишвар даргир шаванд. Дар ҳамин ҳол полис маҷбур шуд, ки барои пароканда кардани ҷамъи онҳо аз  гази ашковар истифода кунад. Ҷомеаи ҷаҳонӣ ин таркишро маҳкум кард ва ба бозмондагони қурбоншудагон изҳори ҳамдардӣ низ карданд.

Муҳаммад Рифоъа Таҳтовӣ, сухангӯи Ал-Азҳари Миср низ ин таркиши дар кишвараш рухдодаро маҳкум кард ва ба қавли ӯ: «эҳтимол, ин таркиш аз ҷониби гурӯҳи «ал-Қоида» анҷом шуда бошад, аммо ҳатман касе ин амалро анҷом додаст, ки фазои солим дар ҷомеа Миср барояш хуш наомадааст. Ва афзудааст: Дар анҷоми чунин таркишҳо Исроил «таҷриба» дорад ва вуҷуд доштани дасти саҳюнистҳо дар ин таркишро баъид намедонам».

Мардуми ин кишвар дар навбати худ ал-Азҳари Мисрро барои ин «дилсӯзиаш» маҳкум карданд, чун ки замоне ду зани тоза мусалмоншудаи қаблан зикр гардида дар дохили калисое дар ин кишвар муҷозот мешуданд, масъулини ин Маркази динии мусалмонон бар лаб мӯҳри хомушӣ зада сокит нишаста буданд.

Таркиш василаи зӮрозмоӢ ё худнишондиҳӢ

Дар пасманзари ин таркиш расонаҳои гурӯҳи аз ҳаводиси ахири Миср бо тафсил навиштаанд, аммо ҳадафи асосӣ ва  ба кӣ манфиат доштани саргардонӣ дар оилаи қурбониён то ҳол паси парда боқӣ мондааст. Атфол ва занони қурбоншудагон низ баъд аз фавти  волидайни худ бесаробон шуданд… боз ашки модар ва тифлони маъсум фалакро ба фарёд хонданд…

Таркиш дар кишварҳои арабӣ ва ба вуҷуд овардани фазои носолим байни диндорон дар Миср баъд аз Ироқ гувоҳи он аст, ки гурӯҳи сеюм пушти онҳо даст ба кор гирифтааст. Онҳо қабл аз ин миёни худи мусалмонон бо номи сунниҳо ва шиаён оташи фитнаро дар кишвар меафрухтанд, вале дар соли нав корро бо тарҳи нав оғоз карданд. Ин гурӯҳ обро  лой карда моҳӣ гирифтан мехоҳад. Яъне, тилои сиёҳ дар Ироқ ва тилои сафед дар Миср…

Аҷаб нест, ки гурӯҳи мазкур ва асли ин шоха, «Ал-қоида» низ аз сарчашмаҳои ғарбӣ об мехурад ва дар кишварҳои мусалмоннишин бо номи ислом ва зери ниқобҳои рангоранг мубориза мебарад. Бар асари чанд таркиш дар назди калисоҳои масеҳиён дар Ироқ ва бо ин сабаб сафар кардани вазирони хориҷии Итолиё ва Олмон ба Ироқ низ аз он дарак медиҳад, ки  ҳанӯз масеҳиёни ғарбӣ барои «ҳифозати ҳаммаслакони худ» дар кишварҳои мусалмоннишин омодаанд бо ҳар қимате, ки бошад ба оташи ин фитна рӯған бирезанд. Чунки замоне Амрико ҷанг дар Ироқро оғоз кард, президенти он Ҷорҷ Буш, бо сароҳат гуфт: Ин ҷанг оғози ҳамлаҳои салибӣ аст.

Президенти Амрико Барак Обама, дар бораи ин ҳамла гуфт: «Маълум аст, ки ҳадафи ҳамлакунандагон намозгузорони масеҳӣ будааст. Ҳамлаварон бояд барои ин иқдоми ваҳшиёна ба сазои аъмолашон бирасанд». Аммо ҷаноби Обама, нагуфт, ки барои ҳамлаҳои ҳар рӯз ва ҳар соат, ки болои мардуми ҷафокаши Афғонистону Покистон ва Ироқ аз сӯи ҳампаймонони Амрико сурат мегирад, кӣ ва кай ва бо чӣ миқдор ғаромат муҷозот мешавад…

Кирилл ҳақ аст!

Коршиносон ҳадс мезананд, ки шояд ҳақ ба ҷониби Кирилл, усқуфи аъзами Русия бошад, ки ӯ дар ин хусус изҳор дошт: «Қурбониёни терроризми байнулмилалӣ ҳар сол садҳо нафар аз тамоми мардуми ҷаҳон ҳастанд. Ин террорристҳо саъй дар истифода аз абзорҳои динӣ ва ихтилофи адён доранд. Афкори палид ва мунҳариф ҳеч гоҳ наметавонанд иртиботе бо адён дошта бошанд. Хатти машйи ин афрод танҳо метавонад сиёсӣ бошад».

 Дар робита ба ҳамлаҳои мубаллиғони насронӣ, ки дар олами ислом бо номҳои мухталиф рисолати худро анҷом медиҳанд ва пайдо шудани таблиғгарони мусалмон дар ҷомеаи ғарбӣ, ки маҳди кунунии масеҳият мебошад, рӯ ба афзоиш аст. Ғарбиҳо иддао доранд, ки замони бархурди тамаддунҳо расидааст, аммо мусалмонон мегӯянд, ки вақти гуфтгӯи адён аст, на бархурд.

Ин гуфтугӯ метавонад танишҳои дар ҷомеи динӣ ба вуҷуд омадаро аз байн бубарад. Ба ибори Қуръони карим пайванди дӯстии масеҳиён бо мусалмонон пайванди фарҳанги динӣ аст. Ӯ Таъоло мефармояд: «Ва қатъан касонеро, ки гуфтаанд мо насронӣ ҳастем, наздиктарин мардум дар дӯстӣ бо мӯъминон хоҳӣ ёфт, зеро бархе аз онон донишмандон ва обидоне ҳастанд, ки такаббур намеварзанд! (Моида, ояи 82)».

Мубаллиғони насронӣ дар ҷаҳон хеле фаъолона ва бар асоси нақшаҳои тарҳрезӣ шуда рисолати худро анҷом медиҳанд ва барои ин кор ҷаҳони масеҳият онҳоро кӯмак мекунад. Ҷуръат пайдо кардани масеҳиёни Миср, ки ҳудуди 10 дар сад аз ҷамъияти 79 миллионнафарии ин кишварро,ки ағлаб мусалмон ҳастанд, ташкил медиҳанд, аз он хабар медиҳад, ки масеҳиён дар Дорфури Судон нерӯманд ва тавоно шудаанд ва дар ҳолати зарурӣ агар кӯмак ҳам карда натавонанд, ба оташи фитна об намепошанд.

Ихтилофот дар Миср масъулини Тоҷикистонро низ огоҳ мекунад, ки 73 ҷараёни мазҳабии ғайриисломии сабтиномшуда дар ҷомеаи беш аз 90 дарсад мусалмони тоҷикро беназорат нагузоранд, мабодо беаҳамиятии чанд тан ба ихтилофоти ғайричашмдошт моро рӯ ба рӯ кунад.  

Амруллоҳи Низом, барои «Рӯзгор»

Адреси доимии маводи мазкур: http://www.ruzgor.tj/siyosat/4076-2011-01-06-06-24-01.html