«TIME»: АЗ ҲУСНӢ МУБОРАК ТО ЭМОМАЛӢ РАҲМОН

Вазъият Мисри имрӯза таваҷҷӯҳи ҷаҳониёнро ҷониби худ кашидааст ва раванди таҳаввулот тавре сурат гирифта истодааст, ки ояндаи онро ҳатто наздиктар ба дақиқӣ пешгӯӣ карда наметавонад. Амрико, ки намехоҳад таъсири худро дар ин кишвар аз даст диҳад, талош дорад сиёсатмадори маъруф ва ғарбигаро Муҳаммад Ал-Бародейиро дар дараҷаҳои аввалияи роҳбарияти сиёсии нави Миср ҷойгир созад.

Кишварҳои исломӣ ва сиёсатмадорони исломгаро дар ин рӯзҳо табли шодӣ мезаданд, ки созмони исломии «Ихвонулмуслимин» лаҷоми ҳокимиятро ба дасти худ мегирад ва ҳукумати ғарбпарасти Муборакро аз байн мебарад. Аммо дар рӯзҳои ахир асосан ҷавонон майдони гирдиҳамоию даргириҳоро ба даст гирифтанд ва эҷоди ҷомеаи озоди мушобеҳ ба кишварҳои Аврупоро тақозо доранд. Ғайр аз ин, задухӯрдҳо миёни муқобилон ва ҷонибдорони давлат ба алангаи вазъият рӯғани тоза рехт ва ояндаи вазъи сиёсии кишварро боз ҳам тиратар сохт.

Дар чунин ҳолат ҳангомаҷӯён рӯ ба тахминзанӣ ва пешгӯиҳои «пайғамбарона» заданд ва талош доранд раванди ояндаи онро мувофиқ бо хоҳишу манфиатҳои худӣ дар шуури ҷомеа ҷо кунанд. Вазъи Мисру Тунисро ба инобат гирифта, амрикоиҳо дар симои маҷаллаи «Time», рӯйхати даҳгонаи кишварҳоеро тартиб доданд, ки гӯё вазъи сиёсии носолим доранд ва сарваронашон ҳокими худкома мебошанд. Аз ҳама аҷибаш, ба ин рӯйхат ворид кардани Президенти Ҷумҳурии Тоҷикистон Эмомалӣ Раҳмон мебошад.

Эмомалӣ Раҳмон дар ҳолате сарварии Тоҷикистонро ба ӯҳда гирифт, ки ин кишвар ба тозагӣ аз собиқ Иттиҳоди Шӯравӣ канда шуда буд ва аз тақсимоти молӣ миёни кишварҳои меросхӯри ин абарқудрат дар канор монда, дар даргириҳои дохилиаш ғарқ буд. Ӯ тавонист, ки тухми кинаю адовати миёни тарафҳои муқобил ҷойдоштаро бо меҳру муҳаббати бародарона иваз намуда, миллати ҷониби парокандагӣ майл гирифтаро гирди ҳам оварад, асолату ифтихор ва шарафмандии миллиро дар қалби онҳо аз нав ҷой кунад ва ҷомеаи тоҷикро ба сӯи ободонию созандагӣ раҳнамун созад.

Дар кӯтоҳтарин муддат тавонист, ки роҳҳои дорои аҳамияти стратегиро миёни пойтахти кишвар ва ду вилояти бузурги ҷумҳурӣ - Суғду Бадахшон, ки солона қариб шаш моҳ бо марказ алоқаи коммуникатсионӣ надоштанд, мавриди истифода қарор диҳад. Дар самти расидан ба истиқлолияти барқии кишвар он қадар корҳо анҷом дода шуданд ва рӯ ба анҷоманд, ки танҳо нобино метавонад онҳоро инкор кунад.

Тоҷикистон имрӯз дар муқоиса бо дигар кишварҳои минтақа аз озодтарин кишварҳост. Озодии сухан дар он сатҳе қарор дорад, ки рӯзноманигорони дигар давлатҳои ҳамҷавор ба ҳамкасбони тоҷики худ ҳасад мебаранд. Миёни сохторҳои давлатӣ ва мардум алоқаи доимие мавҷуд аст, ки ҳамеша на ба таҷамӯъи норизоият, балки ба пайдо намудани роҳи ҳалли онҳо мусоидат мекунанд. Дар Ҷумҳурии Тоҷикистон Ҳизби наҳзати исломӣ ба таври расмӣ фаъолият дорад ва дар тамоми кишварҳои ИДМ дигар созмону ташкилотҳои ҳамтои он амалан вуҷуд надоранд. Намояндагони он дар Парлумони кишвар фаъолият дошта дар қабули қонуну дигар санадҳои меъёрӣ, ҳалли масъалаҳои мубрами сиёсӣ бевосита ширкат меварзанд.

Фикр мекунам, омили асосии ворид намудани Эмомалӣ Раҳмон ба ин рӯйхат он аст, ки номбурда дар сари қудрат дастнишондаи Ғарб ва дигар кишварҳои манфиатдори минтақа набуда, сиёсати мустақили хешро дар доираи манофеи миллии тоҷикон роҳандозӣ дорад ва ба дахолати бозингарони сиёсати нави геополитикӣ ба кишвар монеъ гардидааст. (Бояд қайд кард, ки сарварони Эрону Беларуссия низ бо ҳамин «гуноҳ» ба ин рӯйхат ворид карда шудаанд).

Ба фишорҳои ҳамаҷонибаи ҳамсояҳои дуру наздик нигоҳ накарда, ба Эмомалӣ Раҳмон муяссар шуда истодааст, ки сиёсати иқтисодии ҳукумати кишварро дар самтҳои рушди истеҳсоли қувваи барқ, металлургия, кишоварзӣ ва сохтмони роҳҳо мутаносибан муваффақона пеш барад. Аз ҷониби дигар, ворид намудани Эмомалӣ Раҳмон ба рӯйхати мазкур бартарӣ низ дорад: якум, ҷаҳони Ғарб, хусусан ИМА ошкор намуданд, ки ба мавқеи географӣ ва геостратегии Ҷумҳурии Тоҷикистон бетафовут нестанд ва таваҷҷӯҳашон нисбати дигар кишварҳои минтақа ба ҷумҳурии мо бештар аст, агар баръакс мебуд,

Президенти мо дар рӯйхати худкомаҳо дар даҳгона чӣ, балки дар садгона ҳам ҷой пайдо намекард. Аз ин рӯ, Давлати Тоҷикистон ва идораҳои масъули онро лозим аст, ки дар муносибатҳои берунаи худ боз ҳам ҳушёртар бошанд. Дуввум, ин воридкунӣ метавонад ҳамчун реклама барои кишвари мо хизмат кунад, яъне ҳатман таваҷҷӯҳ ба шиносоӣ бо Тоҷикистон меафзояд ва аз мо сокинони кишвар тақозо мегардад, ки мо худамон, на ин ки кадом амрикоӣ бо «Time»-аш, мақоми шоиста ва ҳақиқии Ватанамонро ба ҷаҳониён муаррифӣ кунем.

Эҳсони Шариф, ҷомеашинос  

Адреси доимии маводи мазкур: http://www.ruzgor.tj/siyosat/4354-hosni-mubara-emomali-rahman.html