Инак шукри Худованди бузург, ки ба баҳори нав расидем.

Баҳор фаслест, ки ҳама мавҷудоти рӯйи замин бо як беқарорӣ фаро расиданашро интизор ҳастанд. Замин-модар,  ҳайвонот, рустаниҳо ва муҳимтар аз ҳама инсонҳо. Зеро ҳамин баҳораст, ки заминаи  ҳаёти фардои пурбаракат ва бофароғати одамонро муҳайё месозад. Дар урфият мегӯянд «Як рӯзи баҳор пур кунад анбор». 

Соле, ки накӯст аз баҳораш пайдост. Иншоаллоҳ, соле, ки бо расидани ин баҳор оғоз мегардад, барои миллати тоҷику тоҷикистониён ва тамоми форсзабонони дунё соли пурфайзу бобаракат хоҳад буд. Зеро муждаи умедворкунандаеро оғози ин баҳор ба ҳамроҳ доштааст. Мужда ин аст, ки  бо қарори Созмони Миллали Муттаҳид ҷашни аҷдодии мо Наврӯз, ки ҳамасола дар оғози ин фасли эъҷозкору эҳёгар таҷлил мегардад,  аз ин ба баъд ба қатори идҳои байналмилалӣ дохил мегардад ва минбаъд дигар он дар тамоми ҷаҳон ҷашн гирифта мешавад.

Аз ин рӯ муштариёни гиромии сомонаи «Рӯзгор» ин навиди нишотбахш ва фаро расидани Наврӯзи хуҷастапайро барои шумо ва хонадони шумо табрику муборакбод гуфта, аз даргоҳи Парвардигори карим дуъо мекунем, ки дар соли нави аҷдодӣ барои ҳар яки мову Шумо  тани сиҳату рӯзгори хуш,  барои Ватани азизамон ваҳдати мардумӣ, сулҳу субот ва  барои хоҷагии халқи он рушду тараққиётро арзонӣ бидорад.

Дӯстони гиромӣ, дар ин  саҳифа  Шумо  имконият доред, наздикону пайвандони хешро бо фаро расидани Наврӯзи Аҷам табрику муборакбод намоед ва таманниёти худро барои аҳли эҷоди сомонаи «Рӯзгор» бифиристед. Интизори навиштаҳои Шумоем. Худо ҳофиз!

Соқиё, сояи абр асту баҳору лаби ҷӯй,
Ман нагӯям, чӣ кун, ар аҳли дилӣ, худ ту бигӯй!