БЕХАБАРИИ ВАЗОРАТИ ТАНДУРУСТИИ ТОҶИКИСТОН АЗ МУҲОҶИРОНИ БЕМОР

Масъалаи ҷорӣ намудани шакли ягонаи ташхиси тиббӣ оид ба саломатии муҳоҷирони меҳнатӣ ва имзои созишномаи миёни Вазорати тандурустии Тоҷикистон ва Вазорати тандурустии Русия аз мавзӯҳое буданд, ки зимни мулоқоти Сафиалло Девонаев, сардори Хадамоти муҳоҷирати Тоҷикистон бо Анатоли Кузнецов, чойнишини сардори Хадамоти федералии муҳоҷирати Русия дар Душанбе баррасӣ шуданд.

Аз Хадамоти муҳоҷират ба сомонаи «Рӯзгор» иттилоъ доданд, ки ҷонибҳо дар ин нишаст ба хулосае омададнд, ки то 31-уми январи соли 2013 нақшаи чорабиниҳоро дар самти ҳамкориҳои вазоратҳои тандурустии Тоҷикистону Русия вобаста ба коркард ва қабули қарори ягона оиди амалигардонии ташхиси тиббии муҳоҷирони меҳнатӣ дар Русия ва Тоҷикистон хотима гузоранд.

Оғози ҳамкориҳои ин ду ҷониб дар хусуси вазъи саломатии муҳоҷирони меҳнатӣ дар ҳоле ба миён омадааст, ки ки Вазорати тандурустии Тоҷикистон хабар надорад, ки шумораи муҳоҷирони меҳнатии тоҷик, ки ба бемориҳои мухталиф гирифтор шудаанду ба Ватан бармегарданд, ба чанд расидааст.

Фотима Ғоибова, сухангӯи Вазорати тандурустии Тоҷикистон зимни сӯҳбат ба «Рӯзгор» сабаби набудани омори муҳоҷирони меҳнатии ба беморӣ гирифторшуда ва ба пуррагӣ аз ташхиси тиббӣ нагузаштани онҳоро дар мавҷуд набудани қонун дар бораи ташхиси ягонаи тиббии муҳоҷирони меҳнатӣ рабт дод ва таъкид намуд, ки то агар чунин қонун ҷорӣ нагардад дар ин самт оморӣ дақиқ вуҷуд дошта наметавонад: «Аз сабаби он ки ин чиз хоҳишмандӣ аст ва на ҳамаи муҳоҷирон хоҳиш мекунанд, бино бар ин оморӣ аниқ дар ягон ҷо вуҷуд надорад».

Темур Раҷабализода, «Рӯзгор»