Сарони кишварҳои узви ҷомеаи ҳамкории иқтисодии АврОсиё зимни нишасти ахири худ дар шаҳри Остона, дар мавриди ихтисоси 70 миллион доллар қарзи боимтиёз барои Тоҷикистон мувофиқат кардаанд. Ин қарз аз Хазинаи зиддибӯҳронии ҷомеаи ҳамкориҳои иқтисодии АврОсиё барои рафъи паёмадҳои бӯҳрони ҷаҳонии иқтисодӣ ба Тоҷикистон ихтисос дода мешавад. Бино ба хабари дафтари матбуоти раёсати ҷумҳури Тоҷикистон, қарори мазкур дар нишасти сарони кишварҳои узви АврОсиё дар шаҳри Остона имзо шуд.

Дар мавриди соҳа ва тарҳҳои мушаххаси истифодаи қарзи боимтиёзи АврОсиё ба Тоҷикистон маълумоте бештар ироа нашудааст. Қаблан, дар ҳошияи нишасти сарони кишварҳои узви Созмони ҳамкориҳои Шанхай дар Тошканд низ, миёни Чин ва Тоҷикистон дар мавриди додани кӯмаки 10 миллион долларии Чин, барои рафъи паёмади бӯҳрони молӣ дар Тоҷикистон, тавофуқ ҳосил шуда буд. Аммо усул ва самти мушаххаси истифодаи он воситаи пулӣ низ эълон нашуда буд.

Иҷлоси Шӯрои ҷомеаи ҳамкории иқтисодии АврОсиё рӯзи душанбе дар шаҳри остонаи Қазоқистон доир шуд. Сарони кишварҳои узви ин ҷомеаи ҳамкорӣ, ба шумулӣ Тоҷикистон, Узбакистон, Русия, Қирғизистон, Белорус ва Арманистон масоили ҳамгироии иқтисодӣ ва тиҷоратиро мавриди баррасӣ қарор доданд.

Зимни ин нишаст, ҳамчунин, созишномаи таъсиси Иттиҳоди гумрукӣ миёни Русия, Белорус ва Қазоқистон ниҳоӣ шуд. Тоҷикистон ва Қирғизистон низ талош доранд ба ин иттиҳод ворид шаванд. Эмомалӣ Раҳмон, раиси ҷумҳури Тоҷикистон гуфтааст, ҳукуматаш ба сурати ҷиддӣ ин масъаларо пайгирӣ мекунад.

Аммо Қирғизистон барои омодасозии муқадамоти узвият дар ин иттиҳод гурӯҳи вижаи корӣ таъсис намудааст. Вале маълум нест, ки пазируфтани ин ду кишвари бо иқтисоди ақибмонда ба Иттиҳоди гумрукӣ то чӣ муддате тӯл хоҳад кашид.  

«Озодӣ»

Адреси доимии маводи мазкур: http://www.ruzgor.tj/iqtisod/2616-2010-07-06-06-24-59.html