ОМОРИ РАСМИИ БЕКОРӢ ДАР ТОҶИКИСТОН

Вазорати кор ва таъмини иҷтимоъии Тоҷикистон гуфтааст, ки дар ин кишвар ҳудуди 47 ҳазор нафар аз бекорон сабт шудаанд. Бар асоси омори расмӣ, ин шумора дар муқоиса бо солҳои қаблӣ коҳишро нишон медиҳад, вале манобеъи мустақил мегӯянд, ки шумори воқеъии бекорон дар Тоҷикистон бамаротиб бештар аз омори расмист.

Маҳмадамин Маҳмадаминов, вазири кор ва таъмини иҷтимоъӣ, ин иттилоъро дар нишасте матбуъотӣ дар ихтиёри хабарнигорон гузошт. Вале оқои Маҳмадаминов афзуд, ки дар се моҳи аввали соли ҷорӣ дар Тоҷикистон беш аз 150 бозори макора (намоишгоҳи ҷойҳои корӣ) баргузор шуд ва дар ҷараёни он беш аз як ҳазор нафар аз бекорон ҷойҳои кори доимӣ пайдо кардаанд.

Коршиносон мегӯянд, ки бо вуҷуди он, ки дар 150 бозори макора машоғили зиёде барои довталабон пешниҳод шуда буд, вале бо таваҷҷӯҳ ба маъоши ночизе, ки барои ин фаъолиятҳо ба сокинон пешниҳод шуда, бисёре аз довталабон аз фаъолият дар ин муассисаҳо ва корхонаҳо худдорӣ мекунанд.

Ва онҳо меафзоянд, ки аксари афроди бекор дар Тоҷикистон кӯшиш мекунад, ки барои пайдо кардани машоғил бо даромади бештар ба хориҷ, аз ҷумла Русия ва Қазоқистон, сафар кунанд. Аммо вазири кор ва таъмини иҷтимоъӣ гуфтааст, ки ин ниҳод тасмим гирифтааст то охири соли ҷорӣ беш аз 40 ҳазор нафар аз ҷавононро барои соҳиби тахассус шудан ба давраҳои омӯзишии мухталиф ҷалб кунад.