"ДАҲ ХАБАРИ РӮЗ" | 26 июни соли 2026

Дар Венесуэла пас ду заминларзаи шадид вазъи фавқулодда эълон шуд

Дар натиҷаи ду заминларзаи пайдарпайи 7,2 ва 7,5 баллӣ, ки рӯзи 24 июн дар наздикии пойтахт Каракас рух доданд, то ҳол дасти кам 188 нафар ҷон доданд ва беш аз 1520 нафар захмӣ шуданд, 157 нафар низ бедарак ҳастанд. Ҳукумати Венесуэла дар як қатор минтақаҳо, аз ҷумла иёлати Ла Гуайра, вазъи фавқулодда эълон кард. Созмони Милали Муттаҳид ва гурӯҳҳои наҷотдиҳӣ аз кишварҳои гуногун ба кӯмак омадаанд .

Рубйо сафари худро ба Халиҷ бо нигарониҳо аз созиш бо Эрон анҷом дод

Вазири корҳои хориҷии ИМА Марко Рубйо сафари серӯзаашро ба кишварҳои Халиҷ анҷом дода, ба иттифоқчиёни араб итминон дод, ки ҳар гуна созиш бо Эрон амнияти онҳоро зери хатар намегузорад. Дар изҳороти муштарак, ҷонибҳо бар таъмини озодии гузар дар Гулӯгоҳи Ҳурмуз таъкид карданд.

Ҳамлаи ҳавоии Исроил ба ҷануби Лубнон оташбасро вайрон кард

Ҳавопаймоҳои ҷангии Исроил рӯзи 26 июн ба деҳаи Байт Яҳун дар ҷануби Лубнон ҳамла карданд, ки ин амал оташбаси барқароршударо вайрон намуд. Дар натиҷаи тирпарронии Ҳизбуллоҳ низ якчанд сарбози Исроил захмӣ шуданд.

Русия ба Тоҷикистон барои мубориза бо нашъамандӣ 413 млн рубл ҷудо мекунад

Русия барои барномаи сесолаи мубориза бо гардиши ғайриқонунии нашъадорҳо дар Тоҷикистон зиёда аз 413 миллион рубл ҷудо мекунад. Созишнома байни Вазорати корҳои дохилии Русия ва Агентии назорати маводи нашъаовари Тоҷикистон ба имзо расидааст.

Дар Покистон дар натиҷаи садамаи автобус 25 нафар ҷон доданд

Дар вилояти Панҷоби Покистон, дар натиҷаи садамаи автобусе, ки дар роҳи кӯҳӣ ҳаракат мекард, дасти кам 25 нафар ҷон доданд ва 18 нафар захмӣ шуданд. Мақомот сабаби аслии ҳодисаро аз кор мондани системаи тормоз ва сар задани сӯхтор эълон карданд.

Русия дар посух ба Руминия консулгарияро мебандад

Вазорати корҳои хориҷии Русия эълом кард, ки дар посух ба бастани консулгарияи Русия дар Константса ва хориҷ кардани консули он, консулгарияи Руминия дар Санкт-Петербург баста мешавад ва консули он ҳамчун "шахси номатлуб" эълон мегардад.

Ҳамла ба киштӣ дар Гулӯгоҳи Ҳурмуз

Як киштии боркаш дар наздикии Гулӯгоҳи Ҳурмуз ҳадафи тирпонии Эрон қарор гирифт. Созмони байналмилалии баҳрӣ (IMO) амалиёти эвакуатсияи 11 ҳазор баҳрнавардро муваққатан қатъ кард. Дар натиҷаи ин ҳодиса, нархи нафт 1,9% боло рафт.

Компанияи "Антропик" Алибоборо ба дуздии технологияи AI айбдор кард

Ширкати амрикоии соҳаи зеҳни сунъӣ "Антропик" (созандаи модели Claude) ширкати чинии "Алибобо"-ро ба дуздии қобилиятҳои AI-и худ айбдор кард. "Антропик" аз Конгресси ИМА хоҳиш кардааст, ки алайҳи чунин ҳамлаҳо чораҳои бештар андешад.

ИМА ва Эрон дар Доҳа канали мустақими иртиботии ҳарбӣ таъсис медиҳанд

Барои кам кардани хатари низоъ, ИМА ва Эрон дар бораи таъсиси як канали бевоситаи иртиботӣ миёни нерӯҳои ҳарбии худ дар Доҳа ба мувофиқат расиданд. Тибқи ин тартиб, намояндаи IRGC ва афсари CENTCOM вохӯрда, ихтилофотро мустақиман ҳал мекунанд .

Ҷоми ҷаҳонии футбол-2026 — Австралия ба марҳилаи плэй-офф роҳ ёфт

Дар бозии ҳалкунандаи гурӯҳи D, Австралия бо ҳисоби 2:1 Парагвайро шикаст дод ва ҳамроҳи ИМА ба марҳилаи плэй-офф роҳ ёфт.

“Рӯзгор”