САФИРИ ПОКИСТОН: КОМЕРУН БА ЧАШМАНДОЗИ СУЛҲ ОСЕБ ЗАДААСТ

Покистон изҳороти нахуствазири Бритониё дар мавриди иртиботи ниҳодҳои давлати он кишвар бо гурӯҳҳои тундравро рад карда ва ӯро ба тазъифи раванди сулҳ дар минтақа муттаҳам сохтааст. Воҷид Шамсулҳасан, сафири давлати Покистон дар Бритониё, дар мақолае, ки дар рӯзномаи "Гордиян", чопи Ландан, мунташир шуда, бо интиқод аз суханони Девид Комерун, нахуствазири Бритониё дар мавриди иртиботи махфиёнаи ниҳодҳои давлатии Покистон бо гурӯҳи Толибон, гуфтааст, ки "як дидори хориҷӣ бо ҳадафи ҷалби ҳамкории тиҷорӣ метавонист бидуни осеб ба чашмандози сулҳи минтақавӣ ҳам анҷом пазирад."

Оқои Шамсулҳасан иттиҳомоти оқои Комерун дар мавриди иртиботи давлати Покистон бо гурӯҳҳои теруристиро мардуд дониста ва онро "муғойири воқеъияти мавҷуд дар саҳна" тавсиф кардааст. Оқои Комерун, ки дар раъси ҳайате аз мақомоти аршади давлатӣ ва гурӯҳе аз бозаргонони бритониёӣ ба Ҳинд сафар карда, рӯзи гузашта дар суханоне дар шаҳри Бонгалур изҳор дошт, ки давлати Покистон наметавонад ба таври ошкор ва расмӣ алайҳи гурӯҳҳои теруристӣ мавзеъгирӣ, аммо дар қафо ба афроди мусаллаҳи ин гурӯҳ кумак кунад.

Зоҳиран ишораи оқои Комерун ба дидгоҳи бархе мақомоти ҳиндӣ дар мавриди иртиботи омилони ҳамалоти Бумбай дар соли 2008 бо Покистон ва ҳамчунин ин иттиҳоми давлати Афғонистон ва баъзе мақомоти ғарбӣ будааст, ки ниҳодҳои амниятӣ ва иттилоъотии Покистон ба манзури таъсиргузорӣ дар шароити минтақа, аз афроди мусаллаҳи Толибон дар Афғонистон ҳимоят ба амал меоваранд.

Вай гуфт "доштани робита бо гурӯҳҳое, ки терурисмро густариш медиҳанд, дуруст нест, давлатҳои озод, ки мехоҳанд узве аз ҷаҳони тавсеъаёфта бошанд, чунин намекунанд ва паёми Иёлоти Муттаҳида ва Бритониё ба Покистон дар ин замина комилан сареҳ аст."

Суханони нахуствазири Бритониё танҳо чанд рӯз пас аз он эрод шуд, ки сойти интернетии "Викиликс" маҷмуъае дар мавриди ҷанги Афғонистонро бо унвони мадорики маҳрамона дар мавриди ин ҷанг дар дастраси корбарон қарор дод, ки бахше аз он ба нақши кишварҳои ҳамсояи Афғонистон ихтисос доштааст. Бар асоси баъзе аз ин мадорик, теъдоде аз ниҳодҳои амниятӣ ва иттилоъотии Покистон бо Толибон дар иртибот будаанд ва аз ин гурӯҳ ҳимоят мекунанд.

Сафири Покистон дар мақолаи худ меафзояд, ки "интизор мерафт, ки нахуствазири Бритониё нақши барҷастаи Покистон дар ҷанг алайҳи терурисм ва фидокориҳои ин кишвар аз замони (ҳамалоти интиҳорӣ) ёздаҳуми сентябрро мавриди таваҷҷуҳ қарор диҳад" ва оқои Комерунро муттаҳам месозад, ки бештар ба матолибе такя карда, ки бар "дарз кардани" маводди иттилоъотии таъйиднашуда ва беэътибор будааст.

Фидокории Покистон ва қадрнашиносии Ғарб

Воҷид Шамсулҳасан бо ёдоварии зарбулмасали форсӣ, ки "мушк он аст, ки худ бибӯяд, на ин ки аттор бигӯяд" дар тавсифи фидокориҳои Покистон дар ҷанг алайҳи терурисм мегӯяд, ки аз соли 2001 то кунун, беш аз ду ҳазору ҳафтсад узви нерӯҳои амнияти ин кишвар ҷони худро аз даст дода ва беш аз нуҳ ҳазор тан аз онон башиддат захмӣ шудаанд ва ин талафот аз кулли талафоти муттаҳидони НОТУ дар минтақа дар ҳамин давра бештар будааст.

Сафири давлати Покистон дар Ландан меафзояд, ки агар барои Ғарб терурисм аз соли 2001 оғоз шуд, таҷрибаи Покистон аз ин падида ба замони ишғоли Афғонистон тавассути нерӯҳои Шӯравии собиқ бозмегардад, ки Ғарб онро "таҳдиде алайҳи ҷаҳони озод" медонист ва Покистонро "садде дар баробари коммунизм" тавсиф мекард.

Оқои Шамсулҳасан дар ишорае талвеҳӣ ба ин иттиҳоми баъзе мақомоти ғарбӣ ва афғон, ки давлати Покистон азми лозимро барои муқобила бо Толибон надорад, гуфтааст, ки кишвари ӯ бидуни доштани манобеъи кофӣ ва "дар фазои оганда аз беэътимодӣ" ҳамчунон бо авоқиби амниятӣ ва иқтисодии сангини ҷанги дохилии Афғонистон дастбагиребон аст.

Дар ҳоле ки бархе манобеъи ғарбӣ, гурӯҳи Толибонро дастпарвардаи ташкилоти амниятии Покистон медонанд, сафири Покистон дар Ландан давлатҳои ғарбиро муттаҳам мекунад, ки барои муқобила бо нерӯҳои Шӯравӣ дар Афғонистон ва Покистон, ки амалан ба ҷазб ва тарбияти мутаъассибини мазҳабӣ машғул буданд, ҳимояти молӣ ба амал меоваранд.

Вай замони интишори аснод тавассути "Викиликс"-ро бо баргузории конфронси Кобул муртабит медонад ва менависад, ки дар ҳоле ки аксари ширкаткунандагон дар ин иҷлос аз ҳадафи аслии он, яъне бозгардонидани субот ба Афғонистон аз тариқи мусолиҳа ва ҷазби мухолифон ҳимоят мекарданд, "маъдуде аз ҷиноҳҳо дар Афғонистон ва бархе кишварҳои ҳамсоя, ки дар садади тасаллут бар ин кишвар ҳастанд, ин нигаришро намеписанданд."

Сафири Покистон дар Ландан аз ин ҷиноҳҳо ва кишварҳои ҳамсоя номе намебурд. Пас аз интишори суханони Девид Комерун, давлати Покистон бо судури баёнияе ин иттиҳомро рад кард, ки ниҳодҳои амниятии он кишвар фаъолияти гурӯҳҳои теруристиро нодида мегиранд ва дафтари нахуствазири Бритониё ҳам гуфт, ки оқои Комерун дар садади муттаҳам кардани Покистон набудааст.

Бо ин ҳама, соъоте баъд, оқои Комерун дар як барномаи телевизиюнӣ суханони қаблии худро санҷида тавсиф кард ва гуфт, ки ҳар навъ иқдоме дар Покистон дар ҳимоят аз терурисм дар нуқоти дигар, иқдоме ғайриқобили қабул аст. Девид Комерун рӯзи панҷшанбе дар идомаи дидор аз Ҳинд, бо истиқболи Момнуҳон Синкх, нахуствазири ин кишвар, ворди Деҳлии Нав, пойтахт, шуд.

Би-Би-Си

Адреси доимии маводи мазкур: http://www.ruzgor.tj/ravzanabajaxon/2789-2010-07-29-12-24-47.html