НИШАСТИ МАТБУОТИИ ПАН ГИ МУН ВА Ҳ.ЗАРИФӢ

Внимание

Lack of access rights - File '/images/stories/2010/04/06_--01-a-aaaaahamrokhon_2.jpg'
Lack of access rights - File '/images/stories/2010/04/06_--01-a-aaaaahamrokhon_2.jpg'
Lack of access rights - File '/images/stories/2010/04/06_--01-a-aaaaahamrokhon_2.jpg'

НИШАСТИ МАТБУОТИИ ПАН ГИ МУН ВА Ҳ.ЗАРИФӢ

Вазири корҳои хориҷии Тоҷикистон Ҳамрохон Зарифӣ ва Муншии умумии СММ Пан Ги Мун имрӯз дар Душанбе барои хабарнигорон нишасти матбуотӣ ташкил намуданд. Ҳ.Зарифӣ ба журналистон хабар дод, ки 5 апрел зимни мулоқоти Президенти Ҷумҳурии Тоҷикистон Эмомалӣ Раҳмон ва Муншии умумии СММ Пан Ги Мун маҷмӯи масъалаҳои марбут ба ҳамкории доманадори Тоҷикистону СММ ва муассисаю барномаҳои он мавриди баррасӣ қарор гирифтанд.

Мусоҳибон ба масъалаҳои амалӣ сохтани Ҳадафҳои рушди ҳазорсола, бартараф сохтани оқибати бӯҳрони ҷаҳонии молиявию иқтисодӣ, хусусан баъзе монеаҳои сунъии дар минтақаи Осиёи Марказӣ ба муқобили Тоҷикистон эҷодшуда диққати асосӣ доданд.

Президенти ҷумҳурӣ Эмомалӣ Раҳмон зикр кард, ки Тоҷикистон ҳамеша бо назардошти манфиатҳои мамлакатҳои минтақа амал мекунад ва барномаҳои мамлакати мо ба манфиати ин мамлакатҳо муқобил гузошта нашудаанд. Баръакс, дар натиҷаи амалӣ сохтани ин барномаҳо, мамлакатҳои минтақа бо қувваи барқи арзон ва оби тоза таъмин карда мешаванд. Сохтмони иншоотҳои гидроэнергетикӣ ба ҳаво хориҷ гардидани газҳо ва партовҳои зарарнокро кам карда, ба қарорҳои дар Копенгаген қабулгардида мувофиқат доранд.

Зикр шуд, ки Эмомалӣ Раҳмон дар ҷараёни мулоқот таваҷҷӯҳи Муншии умумии СММ – ро ба фоҷиаи баҳри Арал ҷалб намуда, изҳор намуд, ки аз ҳад зиёд истифода бурдани об барои қобили кишт гардонидани биёбонҳо сабаби ба миён омадани чунин фоҷиа гардидааст.

Вазири корҳои хориҷии Тоҷикистон изҳори боварӣ намуд, ки Созмони Милали Муттаҳид ба бартараф сохтани проблемаҳои сунъии дар минтақаи Осиёи Марказӣ бамиёномада самарабахш мусоидат карда метавонад. Вай таъкид кард, ки ҳамлу нақли озодонаи мол, сармоя ва қувваи корӣ, рафту омади озодонаи одамон ба мамлакатҳои ҳамдигар ва тадриҷан эҷод кардани муҳити боварӣ дар минтақаи Осиёи Марказӣ бояд аҳамияти аввалиндараҷа дошта бошад. Дар робита зарурати фаъол гардонидани Маркази дипломатияи пешгирикунандаи СММ таъкид карда шуд.

Муншии умумии СММ изҳор намуд, ки захираҳои табиии Осиёи Марказӣ бояд дар шароити шаффофияти умумӣ истифода бурда шаванд. Вай зикр намуд, ки хоҳ газ, хоҳ об ва хоҳ нафт бояд одилона ва бо назардошти манфиатҳои ҳамаи мамлакатҳои ҳамсоя мавриди баҳрабардорӣ қарор дода шаванд. Масъулияти ҳамаи роҳбарони мамлакатҳои Осиёи Марказӣ ва умуман СММ дар ҳамин ифода меёбад, гуфт Пан Ги Мун. Ӯ дар робита зарурати сари мизи мушовара нишастани роҳбарони давлатҳои минтақа ва якҷоя ҳал кардани проблемаҳои мавҷударо таъкид намуд.

Муншии умумии СММ дар хусуси НБО «Роғун» сухан ронда, изҳор намуд, ки масъалаҳои вобаста ба сохтмони нерӯгоҳ, аз ҷумла зилзила, проблемаҳои экологӣ ва ғайра бояд дар асосҳои илмӣ ва фаннӣ таҳқиқ карда шаванд. Роҳбарони Тоҷикистону Ӯзбекистон бояд қарори ҳайати техникии Бонки ҷаҳониро дар ин масъала эҳтиром намоянд, гуфт Муншии умумии СММ.

Вай дар ҷавоби саволи журналистон дар хусуси боздошти молҳои барои Тоҷикистон пешбинишуда дар қаламрави Ӯзбекистон ҷавоб дода зикр кард, ки ин иқдом ба вазъияти соҳаи кишоварзӣ таъсири манфӣ расонида метавонад. Мавсими кишт фаро расидааст ва деҳқонон бояд бо маводи сӯхт, нуриҳои маъданӣ ва тухмӣ сари вақт таъмин карда шаванд. Барои ин тамоми молу маснуоти зарурӣ сари вақт ба мамлакат ворид гардад. Пан Ги Мун роҳбарони ҳар ду мамлакатро даъват кард, ки ин масъаларо бо роҳҳои гуфтушунид ва мусолиматомез ҳаллу фасл кунанд.

Дар ҷараёни нишасти матбуотӣ ба масъалаи безарар гардонидани минаҳои одамкуш дар минтақаи сарҳади Тоҷикистону Ӯзбекистон дахл карда шуд. Пан Ги Мун гуфт, ки СММ барои ҳалли ин масъала тадбирҳо меандешад. Вай дар фарҷоми суханаш ба тадбирҳои Тоҷикистон барои безарар гардонидани минаҳо баҳои баланд дод.