Маҷлиси намояндагон қонун «Дар бораи сиёсати аграрӣ» ва тағйирот ба як қатор кодексҳоро баррасӣ кард

Имрӯз, 11 ноябр, таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода ҷаласаи навбатии иҷлосияи сеюми Маҷлиси намояндагон, даъвати ҳафтум баргузор гардид.

Дар рафти иҷлосия вакилони мардумӣ як қатор санадҳои муҳимми қонунгузориро, ки ба танзими бахшҳои иқтисодӣ, ҳуқуқӣ ва иҷтимоии кишвар равона шудаанд, мавриди баррасӣ қарор дода, оид ба онҳо қарорҳои дахлдор қабул намуданд.

Аз ҷумла, дар рӯзномаи ҷаласа лоиҳаҳои қонунҳои зерин баррасӣ ва пазируфта шуданд:

-Сиёсати кишоварзӣ: Лоиҳаи Қонуни Ҷумҳурии Тоҷикистон «Дар бораи сиёсати аграрӣ», ки ба рушди соҳаи кишоварзӣ ва амнияти озуқаворӣ нигаронида шудааст.

-Ислоҳоти қонунгузории ҷиноятӣ ва маъмурӣ: Лоиҳаҳои қонунҳо оид ба ворид намудани тағйироту иловаҳо ба Кодекси ҳуқуқвайронкунии маъмурӣ ва Кодекси ҷиноятии Ҷумҳурии Тоҷикистон.

-Ҳифзи ҳуқуқи шаҳрвандон ва соҳибкорон: Лоиҳаҳои қонунҳо ҷиҳати ворид намудани тағйиру иловаҳо ба қонунҳои Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» ва «Дар бораи низоми иҷозатдиҳӣ».

Қабули ин тағйирот ба такмили заминаҳои ҳуқуқӣ, соддагардонии расмиёти маъмурӣ ва ҳифзи бештари манфиатҳои шаҳрвандон дар кишвар мусоидат хоҳад кард.

“Рӯзгор”