Эъзоми ҷангандаҳои британиёӣ ба Кипр

Британияи Кабир шаш ҳавопаймои ҷангандаи Typhoon-и худро дар Кипр мустақар кард. Бино ба хабаре, ки ин лаҳзаҳо расонаӣ шуд, ҷангандаҳо дар пойгоҳи ҳарбии Акротирӣҷо ба ҷо карда шуданд. 

Дар хабари вазорати мудофиаи Шоҳигарии Британия омадааст, ки ин тадбир ба хотири ҳифзи манфиатҳои кишвар дар сурати тезутунд шудани авзоъ дар минтақа андешида шудааст. Аммо қарор нест, ки ин ҷангандаҳо дар амалиётҳои ҳарбӣ алайҳи Сурия истифода шаванд. Аз ин пештар чандин воситаҳои ахбори Британия хабар дода буданд, ки дар доираи омодагии эҳтимолии амалиётҳо ба муқобили Сурия  Британияи Кабир ҷангандаҳо ва тайёраҳои боркаши худро ба Кипр интиқол медиҳад.

Дар ҳамин ҳол рӯзи панҷшанбе вазири корҳои хориҷии Кипр Иоаннис Касулидис ба хабаргузориҳо гуфт, ки ба андешаи ӯҷангандаҳои Британия мустақар дар ин кишвар барои ҳамлаи ҳавоӣ ба Сурия нақши калидӣ нахоҳанд дошт. 

Ин шабу рӯз вазъ дар Сурия ба ҳассостарин лаҳазоти худ расидааст. Нерӯҳои хориҷӣ, аз ҷумла киштиҳои ҳарбии ИМА, Британияи Кабир, Фаронса тадриҷан атрофи ин кишварро печидаанд. Ба минтақа бештар аз пештар нерӯҳои ҳарбӣ интиқол дода мешаванд.

Ахиран ИМА ҳатто гуфт, мунтазири эълони натиҷаи кори бозрасони СММ, ки ҳамакнун истифодаи силоҳи химиявӣ дар ҷангҳои дохилии Сурияро мавриди санҷиш қарор медиҳанд, нест. Дабири кулии СММ Пан Ги Мун аз ин гуна изҳори назари Кохи Сафед нигаронӣ кард ва бо ирсоли номае аз Вашингтон хост бозгашти ҳайати эъзомии байналмилалиро мунтазир бошад.

“Рӯзгор”