Ду албоми нави Парвиз Назаров ба ҳаводоронаш расид
Ахиран дар Қазоқистон ду албоми таронаҳои русии овозхони шинохтаи тоҷик Парвиз Назаров бо номҳои «Золотые облака» (“Абрҳои тиллоӣ”) ва «Буду с тобой» (“Бо ту хоҳам буд”) интишор шудааст.
Журналисти тоҷики муқими Қазоқистон Насибҷон Амонӣ ба “Рӯзгор” гуфт, ки сароянда албомҳои нави худро дар ҳузури мухлисонаш муаррифӣ кард ва ҳамзамон клипи наверо, ки шомили албоми таронаҳо нашудаву бо забони модариаш сурудааст, намоиш додааст. Насибҷон Амонӣ ҳачунин гуфт, ки албоми таронаҳо ҳудудан 40 суруди дар солҳои охир сароидаи ҳунармандро дар бар гирифтаанд
Парвиз Назаров 42 сол дошта, зодаи шаҳри Маскав аст. Бачагӣ ва ҷавонии худро дар Душанбе гузаронидааст, аммо аз соли 1993 ба инҷониб сокини шаҳри Алмаатои Қазоқистон шудааст ва ҳоло дар ин шаҳр кор ва эҷод мекунад. Парвиз Назаров аслан сарояндаи каммаҳсул аст, вале таронаҳояш ба дили шунаванда зуд асар мекунанд. Таҳлилгарон мегӯянд Парвиз аз он кам эҷод мекунад, ки нисбат ба худ хеле серталаб аст ва аз сароидани таронаҳои каммоя ҳамеша худдорӣ меварзад.
«Рӯзгор»