Барзу "Дон Жуан"-ро ба саҳнаи қирғиз овард

Рӯзҳои 18-20 апрели соли равон дар театри давлатии русӣ-драмавии ба номи Чингиз Айтматови шаҳри Бишкек нахустнамоиши "Дон Жуан", ки аз рӯи асари ҳамноми Молйер коргардони шинохтаи тоҷик Барзу Абдураззоқов ба саҳна гузоштааст, баргузор мешавад.

Барзу аз охири соли гузашта бо даъвати ҳукумати Қирғизистон ба шаҳри Бишкек рафт ва ҳафтае қабл беҳтарин коргардони қирғиз зарфи панҷ соли охир эълон шуд. "Дон Жуан" аз ҷумлаи шоҳасарҳои ҷаҳонист, ки як хонаводаи ашрофзода ва сарватманди асри миёнаро ба риштаи тасвир кашидааст. Хонаводае, ки бо ҷоҳталабию қудратталабӣ ба оташи шаҳват печидаву бунёди инсонии худро гаравгони хостаҳои шаҳвонӣ кардааст.