ИДИ КИТОБ ДАР БАДАХШОН
Имрӯз дар мактаби таҳсилоти ҳамагонии маркази ноҳияи Ванҷ чорабинии фарҳангии «Иди китоб» ба муносибати 60 - солагии маҷаллаи «Истиқбол» баргузор гардид. Дар гузашта ин маҷалла бо номи «МАШЪАЛ» машҳур буд ва нашрияи дӯстдоштаи бачаҳои ҷумҳурӣ ба ҳисоб мерафт.
Сардабири маҷаллаи «Истиқбол» Латофат Кенҷаева ва адибону рӯзноманигорони шинохтаи ҷумҳурӣ Ато Мирхоҷа, Ворис, Султони Ҳамад, Мавҷудаи Соҳибназар, Бузургмеҳри Баҳодур дар он маҳфил суханрониву шеърхонӣ карданд. Ба ҷуз ин сардабири маҷаллаи «Истиқбол» барои атфоли ноҳия шумораи зиёди китобҳои бадеии бачагонаро ҳадя намуд.
Ёдрас шудан ба маврид аст, ки дирӯз ин «Иди китоб» дар ду мактаби таҳсилоти ҳамагонии ноҳияи Дарвоз баргузор шуда буд ва ба китобхонаи шахсии Адабҷон Амирҷонов дар деҳаи Ёгед беш 120 китоби мухталиф тақдим карда шуд. Тазаккур медиҳем, ки «Иди китоб» бахшида ба 60-солагии маҷаллаи «Истиқбол» то охири ҳафта дар дигар ноҳияҳои Вилояти Мухтори Кӯҳистони Бадахшон идома меёбад.
«Рӯзгор»