ИНСТИТУТИ ИЛМҲО НОМИ БАҲОДУР ИСКАНДАРОВРО ГИРИФТ

Ба ифтихори 100 солагии зодрӯзи таърихшиноси машҳури тоҷик, академик Баҳодур Искандаров  дар Институти илмҳои гуманитарии Академияи Илмҳои Ҷумҳурии Тоҷикистон дар ВМКБ конфронси илмӣ баргузор гардид. Институти номбурда бо иқдоми Ҳукумати Ҷумҳурии Тоҷикистон ба номи академик Баҳодур Искандаров гузошта шуд.

Вобаста ба ин рӯйдоди муҳим дар Институти улуми инсонии шаҳр бо иштироки Муовини раиси  Маҷлиси Милиии Маҷлиси Олии Ҷумҳурии Тоҷикистон, раиси ВМКБ Қодири Қосим, президенти Академияи Илмҳои Ҷумҳурии Тоҷикистон академик Мамадшо Ҳилолов, директори Институти  тарих, бостоншиносӣ ва мардумшиносии  ба номи Аҳмади Дониши Академияи Илмҳои Ҷумҳурии Тоҷикистон, академик Раҳим Масов конфронси илмӣ баргузор гардид.

Дар оғози конфронс аз ҷониби раиси ВМКБ ва меҳмонон лавҳаи унвонгузории пажуҳишгоҳ расман боз карда шуда, аз фаъолиятҳои илмии Баҳодур Искандаров хотираҳо гуфта шуданд.

Дар рафти конфронс оиди ҳаёту фаъолият, корҳои илмӣ ва машақатҳои роҳи илмандӯзии Баҳодур Искандаров аз ҷониби устодони Донишгоҳи Давлатии шаҳри Хоруғ маърӯзаҳо баррасӣ гардида, мавриди суолу ҷавоб қарор дода шуданд.

Президенти Академияи Илмҳои Ҷумҳурии Тоҷикистон, академик Мамадшо Ҳилолов аз масъулини пажӯҳишгоҳ дархост намуд, ки барои таъсис додани китобхонаи асарҳои Баҳодур Искандаров дар бинои Институт як утоқ ҷудо гардад ва ӯ инчунин қайд намуд, ки Академияи Илмҳо дар ғанигардонии фонди китобхона онҳоро дастгирӣ хоҳад намуд.

Алишер Ҷунайдов, «Рӯзгор» Хоруғ