Ширкати қориёни Қуръон аз 36 кишвар дар озмуни байналмилалии Маскав
Шӯрои муфтиёти Федератсияи Русия эълон кард, ки шаҳри Маскав мизбон ва пазирои қориёни Қуръони Маҷид аз 36 кишвари олам хоҳад буд. Қарор аст озмуни байналмилалии қориёни Қуръон 15 сентябри соли равон дар пойтахти давлати Русия доир гардад.
Ин чорабинӣ таҳти сарварии Раиси Шӯрои муфтиёти Русия Равил Гайнутдинов ва дастгирии ҳукумати шаҳри Маскав, вазоратҳои корҳои хориҷӣ ва фарҳанги Федератсияи Русия дар зали консертии “Россия” мегузарад.
Дар озмун аз 36 мамлакати олам, аз ҷумла қориён аз Британияи Кабир, Нидерландия, Булғористон, Тунис, Яман, Баҳрайн ва чандин кишвари дигар иштирок мекунанд. Шайх Абубакр Шатрӣ, яке аз донандагони хуби Қуръон ва ҳофизи машҳур меҳмони фахрии ин чорабинӣ хоҳад буд. Озмун аз рӯи номинатсияи ҳифзи Қуръони Карим хоҳад гузашт.
«Рӯзгор»