Президенти тозаинтихоби Тоҷикистон савганд ёд кард
Имрӯз дар Қасри «Миллат» ба Президенти тозаинтихоби Ҷумҳурии Тоҷикистон Эмомалӣ Раҳмон дар маросими ботантана аз ҷониби Шермуҳаммад Шоҳиён, раиси Комиссияи марказии интихобот ва раъйпурсии Ҷумҳурии Тоҷикистон шаҳодатномаи Президенти Ҷумҳурии Тоҷикистон супорида шуд.
Ҳамзамон дар ин маросими ботантана ба Президенти Ҷумҳурии Тоҷикистон Эмомалӣ Раҳмон раиси Суди конститутсионии Ҷумҳурии Тоҷикистон Маҳкам Маҳмудов тибқи муқаррароти қонунгузории Ҷумҳурии Тоҷикистон рамзи ҳокимияти президентӣ - Нишони Президенти Ҷумҳурии Тоҷикистонро супорид.
Сипас, Президенти тозаинтихоби Ҷумҳурии Тоҷикистон Эмомалӣ Раҳмон ба ҷониби Кохи «Сомон»-и бӯстонсарои Ҳукумати мамлакат раҳсипор гардида, дар ҷаласаи якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон савганд ёд кард.
Бояд тазаккур дод, ки дар ҷаласаи якҷояи палатаҳои Парлумони мамлакат аъзои Маҷлиси миллӣ, вакилони Маҷлиси намояндагон, аъзои Ҳукумати Ҷумҳурии Тоҷикистон, роҳбарону кормандони масъули вазорату идораҳои кишвар, иттиҳодияҳои ҷамъиятӣ ва намояндагони корпусҳои дипломатии муқими Тоҷикистон ширкат доранд.
Марзия Саидова, АМИТ «Ховар»