Иди Истиқлоли давлатӣ ва Иди саиди Қурбон, муборак, ҳамватанони азиз!

Мо дар остонаи ду Иде қарор дорем, ки барои мардуми Тоҷикистон ва мусалмонони тамоми ҷаҳон хеле азизу муътабаранд. Иди Рӯзи Истиқлолияти Ҷумҳурии Тоҷикистон ва Иди саиди Қурбон. Барои мо тоҷикистониён фарорасии ин ду Ид дар як вақт албатта рамзеву ҳикмате бо худ дорад.

Истиқлолият бузургтарин неъматест, ки 25 сол қабл Парвардигори олам барои мо мардуми Тоҷикистон онро арзонӣ дошта буд. Вале мутааассифона, ҳамон замон ношукрие, носипосие, қадрношиносие, кутаҳназарие, ҳамдигарнофаҳмие аз мо рух дод, ки ваҳдати миллӣ, субботу амнияти кишвар, рӯзгори осоиштаи мардум қурбонии ин гуна амалкардҳо шуданд. Муддате Ватани азизи мо ба гирдоби хунине кашида шуд, ки аз он вартаи нобудӣ ба ивази додани садҳо ҳазор ҷон қурбонӣ ва талафоти бузурги молӣ пеш аз ҳама бо лутфу карами Парвардигори азимушшаън ба соҳили амну амонӣ расидем. Шукронаи сулҳу суботи кишварро бояд ба ҷо биёрем.

Шукрона кардан ин танҳо бо забон шукр гуфтан нест. Шукронаи мо метавонад амале бошад, ки сулҳу суботро дар кишвар таҳким мебахшад, ваҳдати миллиро устувор мегардонад, мардуми парешонро сарҷамъ месозад, Ватани азизамонро обод мекунад. Шукронаро ҳам сағир бояд бигӯяду ҳам кабир. Бо додани қурбонӣ дар арафаи Иди саиди қурбон ҳам мешавад шукронаи Парвардигорро ба ҷо биёрем.

Вале чиро бояд қурбонӣ кунем? Биёед, пеш аз ҳама кинаву адоват, ҳирсу ҳасад, бухлу кудуратро, ки аз хислатҳои бадтарини инсонист ва дар қалбҳои ҳар яки мо буда метавонанд, ба нишонаи шукронаи Худованди бузург барои лутфу карамаш, файзу эҳсонаш, барои эҳдои ин рӯзгори орому осудаи Тоҷикистони азиз қурбонӣ кунем. Забҳи бадтарин хисоли инсонӣ дар ботини худ,дар рӯзи Иди Истиқлолият, Иди саиди Қурбон, иншоАллоҳ қурбониест, ки мақбули даргаҳи Парвардигори олам хоҳад буд.

Иди Рӯзи Истиқлолияти давлатии Ҷумҳурии Тоҷикистон ва Иди саиди Қурбон муборак, дӯстон ва ҳамватанони азиз!

Аз саҳифаи фейсбукии Султон Ҳамад