Намоишгоҳи байналмилалии «Китоби Душанбе» ба кори худ анҷом дод

Дирӯз (27 ноябри соли 2017) Намоишгоҳи ҳафтуми байналмилалии «Китоби Душанбе» ба кори серӯзаи худ анҷом дод. Ба ин муносибат дар бинои Театри давлатии опера ва балети ба номи устод Садриддин Айнӣ маросими пӯшидашавии он баргузор гардид.

Дар он вазири фарҳанги Тоҷикистон Шамсуддин Орумбеков ширкаткунандагон ва дастандаркорони Намоишгоҳро бо натиҷаҳои бадастоварда табрик гуфт. Сипас ба як қатор иштирокчиёни ин Намоишгоҳ, ки дар он фаъол буданд, мукофотҳои хотиравӣ супурда шуд.

Намоишгоҳи байналмилалии «Китоби Душанбе» бори ҳафтум аст, ки ҳамасола дар пойтахти Тоҷикистони азиз баргузор мегардад ва дар он ба ҷуз ниҳодҳои тоҷикистоние, ки бо табъу нашри китоб ва фурӯшу таблиғи он сару кор доранд, бархе аз муассисаҳои ҳамтои хориҷии онҳо аз баъзе кишварҳои минтақа, азҷумла Федератсияи Русия, ИМА , Ҷумҳурии Мардумии Чин, Ҷумҳурии Белорусия, Ҷумҳурии Туркия, Ҷумҳурии Исломии Афғонистон ва ғайра ширкат менамоянд. Вижагии Намоишгоҳи имсола аз он иборат буд, ки дар он бори аввал намояндагони Ҷумҳурии Ӯзбекистон ширкат карданд ва дар ҳамин ҳол намояндагони Ҷумҳурии Исломии Эрон имсол дар он ширкат надоштанд.