ПАРВАНДАҲОИ ҶИНОӢ АЛАЙҲИ ЗИНДОНБОНҲОИ "ФИРОРИЁН"

Внимание

Lack of access rights - File '/images/stories/2010/09/13_prison2548325178'
Lack of access rights - File '/images/stories/2010/09/13_prison2548325178'

ПАРВАНДАҲОИ ҶИНОӢ АЛАЙҲИ ЗИНДОНБОНҲОИ "ФИРОРИЁН"

Додситонӣ дар робита ба ҳодисаи фирори 25 зиндонӣ, алайҳи бархе аз зиндонбонҳо парвандаҳои ҷиноӣ боз кардааст. Дар ин ҳодиса чаҳор корманди Вазорати адлияи Тоҷикистон мазнун маҳсуб шудаанд. Ин дар ҳолест, ки дар кишвар сару садоҳое дар бораи даст доштани бархе аз мақомоти баландпояи амниятӣ ва умури зиндонҳо дар ҳодисаи фирори зиндониён паҳн шудааст. Додситонии ноҳияи Исмоили Сомонии шаҳри Душанбе дар мавриди фирори гурӯҳи 25 нафарии зиндониён аз боздоштгоҳи Кумитаи давлатии амнияти миллии Тоҷикистон, ки шаби 23 август рух дода буд, парвандаи ҷиноӣ боз кардааст.

Додситонӣ ду сарбози 19 ва 20-сола ва гурӯҳбон ё сержанти 21-солаи умури зиндонҳои Вазорати адлияи Тоҷикистонро дар нақзи муқаррароти хидмати посбонӣ мазнун донистааст. Ҳамчунин алайҳи як саргурд, ки шаби фирои зиндониён масъули посбонии боздоштгоҳи Вазорати адлия буд парвандаи ҷиноӣ боз кардааст. Гуфта меашвад, ин саргурд ба як маъмури зиндон иҷоза додааст, худрави хусусии худро дар назди девори ин боздоштгоҳ нигаҳ дорад.

Зиндониён бо истифода аз ин худрав аз маҳалли ҳодиса фирор кардаанд. Як рӯз баъд аз ин ҳодиса ин худрав дар минтақаи Ромит ошкор шудааст. Ҳодисаи фирори гурӯҳи 25 нафарии зиндониён аз боздоштгоҳи Кумитаи давлати амнияти миллӣ бесобиқа аст. Гузашта аз ин, зиндониён тавонистаанд ду посбони боздоштгоҳи амният ва се посбони боздоштгоҳи Вазорати адлияро ба қатл расонанд.

Дар пайи ин фирор мақомоти Кумитаи давлатии амнияти миллии Тоҷикистон аз симматҳои худ барканор шуда ва Саймумин Ятимов, ки муъовини раиси ин кумита буд, бо фармони Президент Раҳмон раёсати ин кумитаро бар ӯҳда гирифт. Дар ин миён дар доираҳои мухталифи кишвар шоъеоте дар бораи имкони даст доштани бархе аз мақомоти баландпояи ин кумита дар ҳодисаи фирори зиндониён паҳн шудаанд.

Вале маркази матбуъотии Кумитаи давлатии амнияти миллии Тоҷикистон дар ин замина изҳори беэътилоӣ карда ва гуфтанд, ки таҳқиқи ҳодисаи фирор идома дорад. Аммо суоли матраҳ ин аст, ки чаро дар ҳоле, ки зиндониён аз боздоштгоҳи Кумитаи давлатии амнияти миллии Тоҷикистон фирор кардаанд, парвандаҳои ҷиноӣ алайҳи зиндонбонҳои боздоштгоҳи Вазорати адлия боз шудааст?

Манобеъи додситонии ноҳияи Исмоли Сомонӣ мегӯянд, боздоштгоҳи амниятӣ дар дохили муҳавватаи боздоштгоҳи Вазораит адлия воқеъ буда ва дарвозаи муштарак дорад. Ба ин далел ҳифозати берунии ду боздоштгоҳ бар ӯҳдаи идораи умури зиндонҳои Вазорати адлия будааст.

Вале Парвин Ализода, сухангӯйи идораи умури зиндонҳои Вазорати адлияи Тоҷикистон ҳафтае қабл дар мусоҳибаҳои худ бо расонаҳои гурӯҳӣ изҳор дошта буд, ки таъмини ҳифозати боздоштгоҳи амниятӣ нокофӣ буд. Вай аз ҷумла гуфта буд, ки маъмурони амниятӣ муқарарроти идораи умури зиндонҳоро нодида гирифта ва “ҳатто аз нишон додани мадорики худ ба кормандони ин идора сарфи назар мекарданд”.

Бо ин вуҷуд, ба гуфтаи Парвин Ализода, зиндонбонҳои Вазорати адлия талош кардаанд, ки ба фарори зиндониён монеъ шаванд, вале аз сӯйи онҳо кушта шуданд. Зимнан, то ҳол ниҳодҳои интизомӣ ва амниятии кишвар ба боздошти шаш нафар аз гурӯҳи 25-нафарии зиндониёни фирорӣ муваффақ шудаанд. Бархе аз коршиносон бар ин назаранд, ки дер ё зуд бештаре аз онҳо боздошт хоҳанд шуд.

Аммо онҳо мегӯянд, фирори гурӯҳе ба ин бузургӣ аз боздоштгоҳи амниятӣ, ки дар наздикии манзили зисти раиси ҷумҳури кишвар воқеъ аст, ба эътибори давлати Тоҷикистон латмаи ҷиддие ворид кардааст.