ШАШ САРБОЗИ ХОРИҶӢ ДАР АФҒОНИСТОН КУШТА ШУДАНД

Нерӯҳои байнмалмиллалии ёрии амниятӣ, ISAF (Ойсоф) дар Афғонистон аз кушта шудани шаш сарбози худ дар ҷануби Афғонистон хабар додааст. Маркази фармондеҳии нерӯҳои Ойсоф дар Кобул бо судури эъломияе гуфтааст, ки ин сарбозон дар ҷараёни ҳамлаи шӯришиён дар ҷануби Афғонистон кушта шуданд.

us_soldiers Ойсоф маҳалли дақиқи ин ҳодиса ва ҳамчунин миллият ва ҳуввияти ин сарбозонро мушаххас накардааст. Соли ҷории мелодӣ хунинтарин сол барои нерӯҳои байналмиллалӣ дар Афғонистон аз замони оғози ҳузури ин нерӯҳо (соли 2001) дар ин кишвар будааст. Дар соли ҷории мелодӣ 670 сарбози хориҷӣ дар Афғонистон кушта шудаанд, дар ҳоле ки ин омор дар соли 2009 мелодӣ ба 502 нафар расида буд. Шуморе аз ин сарбозон дар даргириҳои мустақим бо шуришиён кушта шудаанд, аммо бештари онҳо дар пайи инфиҷорҳои бумбҳои канориҷодаӣ ҷони худро аз даст додаанд.

Дар ҳоли ҳозир ҳудуди 150 ҳазор сарбози хориҷӣ дар Афғонистон ҳузур доранд ва мақомҳои омрикоӣ гуфтаанд, ки аз нимаи соли ояндаи мелодӣ раванди хуруҷи нерӯҳои худ аз ин кишварро оғоз мекунанд. Ҳарҷанд бархе бо ин истидлол ки ҳанӯз шӯришиён ва гурӯҳҳои мусаллаҳи мухолифи давлати Афғонистон фаъол ҳастанд, таъини замоне мушаххас барои хуруҷи ин нерӯҳоро тасмиме дуруст надонистаанд. Аммо ахиран Роберт Гейтс, вазири дифоъи Омрико дар сафаре ба Афғонистон гуфт, ки вазъият дар ин кишвар дар ҳадде "беҳбуд" ёфтааст, ки барномаи хуруҷи низомӣ аз он қобили иҷро бошад.