«АЗИЯ-ПЛЮС» ЯК МИЛЛИОН «МИНУС»?

Сардори раёсати ВКД ҶТ Анвар Тағоймуродов, нашрияи "Азия-Плюс"-ро ба додгоҳ кашида, ба маблағи як миллион сомонӣ ҷуброн хостааст.

Сабаби ба додгоҳ кашида шудани нашрияи «Азия-Плюс» ин мақолае таҳти унвони «Тафтишот ё инквизитсия?» мебошад, ки моҳи декабри соли гузашта дар ин нашрия чоп шуда буд. Дар ин маводи тадқиқотии нашрия лаҳзаҳое аз шиканҷаи боздоштшудагон тавассути кормандони раёсати мубориза бо ҷиноёти созмонёфтаи ВКД, аз ҷумла дар вилояти Суғд инъикос ёфта буданд.

Анвар Тағоймуродов даъво дорад, ки ин нашрия бо чопи ин матлаби таҳвиномез на танҳо ба эътибори ин ниҳоди интизомӣ, балки ба шахсияти ӯ иснод овардааст. ар ин иртибот ӯ аз мақомоти додгоҳӣ талаб кардааст, ки ба фоидаи ӯ аз ҳисоби нашрияи «Азия Плюс» ба маблағи як миллион сомонӣ ҷуброни зарари маънавӣ бирӯёнанд.

Дар аризаи даъвогии Сардори раёсати мубориза бо ҷиноёти ВКД омадааст, ки шояд муаллифи мақолаи мазкур ва хабарнигорони дигари нашрия омилони ҳамлаи террористии Хуҷандро медонистанд ва аз кори онҳо хабар доштанд ва ҳатто эҳтимолан ҳамкорӣ байни онҳо вуҷуд доштааст.

Муаллифи мақолаи мазкур ва масъулини нашрияи «Азия Плюс» дар посух ба ин даъвои Анвар Тағоймуродов изҳор медоранд, ки он асос надорад ва хабарнигорони нашрия ба ҳеҷ ваҷҳ бо террористон ҳамкорӣ накардаанд.

«Рӯзгор»