БУНЁДИ ЯК САРБОЗХОНАИ ҶАДИДИ МАРЗӢ ДАР ШӮРООБОД

Имрӯз дар наздикии марзи Тоҷикистон ва Афғонистон дар ноҳияи Шӯрообод як бинои дуошёна барои марзбонон ифтитоҳ шуд. Бунёди ин сохтмон бо беш аз як милюн дулор сармояи давлати Амрико анҷом шудааст. Ин бино ҳам аз сарбозхона, ҳам аз тамрингоҳ ва ошхона иборат аст. Об ва системи гармӣ ҳам дорад.

Барои таъмини нерӯи барқ дар рӯзҳои маҳдудияти барқ дар ин сохтмон ботериҳои хуршедӣ ва женеротур ҳам насб шудааст. Вилям Броузфилд, муъовини вазири хориҷаи Амрико дар умури мубориза бо маводди мухаддир ва ҷароим, низ дар ҷараёни ифтитоҳи ин сохтмон ширкат ва суханронӣ кард.

Давлати Амрико дар ҳамкорӣ бо Идораи мубориза бо маводди мухаддир ва ҷароими СММ ҳамчунин ҳафт дидбонгоҳро дар минтақаи Шӯрообод тармим кардааст. Танҳо дар соли ҷорӣ кумакҳои молии Амрико ба марзбонони тоҷик ду милюн дулорро ташкил додааст. Дар чаҳор соли ахир кумакҳои Амрико ба марзбонони тоҷик 16 милюн дулор будааст.

Оқои Броузфилд гуфтааст, ки агар марзи Тоҷикистон бо Афғонистон таҳким шавад, ҳам Тоҷикистон, ҳам Урупо ва ҳам Амрико аз хатари қочоқи маводди мухаддир эмин хоҳанд буд. Бинои сохташуда барои 150 сарбоз ва афсари нерӯҳои тақвиятии марзбонӣ пешбинӣ шудааст, ки фақат дар сурати ноором шудани вазъ ба кумаки марзбонҳо мераванд.

Дар расми ифтитоҳи сарбозхонаи ҷадид дар Шӯрообод сафири Амрико, муъвоини вазири хориҷаи Амрико, муъвини фармондеҳи нерӯҳои марзбонӣ, Сафаралӣ Назирвов, низ ширкат доштанд. Минтақаи марзии Шӯрообод аз душвортарин манотиқи марзии Тоҷикистон бо Афғонистон будаст.