ИНТИЗОРИ НАТИҶАҲОИ ИНТИХОБОТ ДАР АФҒОНИСТОН
Дар ҳоле ки ду номзад худро пирӯз мешуморанд, интизор меравад, ки имрӯз бахше аз натиҷаҳои интихоботи президентии Афғонистон эълон шавад. 
Кумиссиюни мустақили интихоботӣ дар Афғонистон гуфт, имрӯз натиҷаҳои муқаддамотии 10 дарсади раъйҳоро эълом мекунад. Аммо натиҷаҳои умумӣ рӯзи 3-вуми сентябр нашр хоҳанд шуд. Ҳарду номзади аслӣ дар интихобот Ҳомиди Карзай – раиси ҷумҳури феълӣ ва Абдулло Абдулло - собиқ вазири умури хориҷии Афғонистон, худро пирӯзи интихоботи раёсатҷумҳурии 20-уми август эълом кардаанд. Доктор Абдулло ҳамчунин мегӯяд, дар интихобот ба нафъи Ҳомиди Карзай таққалуби густурдае сурат гирифтааст.
Намояндаи Созмони Милали Муттаҳид дар Афғонистон, Кай Эйде, рӯзи душанбе аз номзадҳо ба мақоми раёсати ҷумҳурӣ хост, сабур бошанд, то ки кумиссиюни интихоботӣ шикоятҳо дар бораи таққалубкориҳоро таҳқиқ кунад.
«Озодӣ»
