ДУ ЧАРХБОЛИ "ТОҶИК ЭЙР" ДАР КОБУЛ БОЗДОШТ ШУДААСТ
Ду чархболи муталлиқ ба ширкати "Тоҷик Эйр" дар Афғонистон боздошт шуда, иҷозаи бозгашт ба ватанро надоштаанд. Ду чархболи МИ-8-и ширкати "Тоҷик Эйр" бо 12 сарнишинаш як моҳ инҷониб дар Афғонистон боздошт шуда, иҷозаи бозгашт ба ватанро надоштаанд.
Дар ин бора ба мо Илҳом Қаюмов, бортмуҳандиси яке аз чархболҳо, хабар дода ва гуфт, мақомоти Афғонистон онҳоро ғайриқонунӣ боздошт ва нигаҳдорӣ мекунанд. "Тибқи қарордод бояд ҳудуди як моҳ қабл ба Тоҷикистон бармегаштем, аммо чархболҳоро иҷозаи парвоз надода, шиносномаи моро ҳам гирифтанд",-мегӯяд Қаюмов.
Ба қавли ҳамсӯҳбати мо, дар ҳоли ҳозир онҳо дар канори шаҳри Кобул ба сар мебаранд ва мунтазири иҷозаи мақомоти Афғонистон барои бозгашташон ба Тоҷикистонанд. Ӯ мегӯяд, "ин ҳодиса замоне иттифоқ афтод, ки вазорати нақлиёти Афғонистон иддао кард, гӯиё мо - аъзои тими ҳавонавардони ин ду чархбол чархболҳоро рабуданӣ ва бе иҷозаи қаблии хадамоти диспетчерии фурудгоҳи Кобул парвоз карданӣ будем."
Вай афзуд, "агарчӣ пас аз чанд рӯз ин иттиҳомотро аз дӯши мо бардоштанд, аммо ҳанӯз чархболҳоро вазорати нақлиёт ва амнияти Афғонистон раҳо намекунад." Илҳом Қаюмов илова кард, ки чархболҳои боздоштшудаи ширкати "Тоҷик Эйр" мувофиқи қарордод барои таъмини нерӯҳои НАТО бо об ва ғизо дар Афғонистон кор мекарданд.
«Озодӣ»