ИСТЕҲСОЛИ МОҲӢ ДАР ТОҶИКИСТОН АЗ ТАЛАБОТ САДҲО МАРОТИБА КАМТАР АСТ
Тибқи иттилои Агентии омори назди президенти Тоҷикистон таи 7 моҳи соли ҷорӣ дар кишвар 215 тонна моҳӣ истеҳсол шудаст, ки ин дар муқоиса бо талаботи кишвар садҳо маротиба камтар арзёбӣ мешавад. Талаботи солонаи аҳолии Тоҷикистон ба моҳӣ, тибқи меъёрҳои физиологӣ 23 кг сари як нафар муайян шудааст ва мувофиқан ба 172 ҳазор тонна баробар мебошад.
Қонеъ намудани талаботи аҳолии Тоҷикистонро бо моҳиро масъулини КВД «Моҳии Тоҷикистон» мақсади асосиашон меномад. Масъулини КВД мегӯянд, тибқи барномаи «Рушди соҳаи моҳипарварӣ барои солҳои 2009 – 2015» ки тобистони соли 2008 –ум аз ҷониби ҳукумати кишвар тасдиқ шудааст, истеҳсоли моҳӣ бояд то соли 2015 ба 2,5 ҳазор тонна расонда шавад.
Коршиносони моҳипарварӣ монеаҳои рушди соҳаро дар Тоҷикистон, набудани хӯрокаи моҳии истеҳсоли дохилӣ ва таҷҳизоти зарурӣ меномад. Масъулини ин бахш мегӯянд, қарори ҳукумати Тоҷикистон оиди ҷудо намудани замини обӣ барои кишти хӯрокаи моҳӣ ба таври зарурӣ иҷро нагардидааст ва масоҳати лозимаи замин ҷудо нашудаст.
Темур Раҷабализода, «Рӯзгор»
Шарҳҳо
RSS Обуна