А.АБДУҚАҲҲОР: МАҚСАДИ НИҲОИИ МО БА 5-УМИН ШАБАКАИ МИЛЛӢ ТАБДИЛ ДОДАНИ ТВ «ПОЙТАХТ» АСТ

Темур Раҷабализода «Рӯзгор»

Бо гузаштан ба пахши шабонарӯзии телевизиони «Пойтахт» масъулини ин шабака бар ин  назаранд, ки аз ин ба баъд ин телевизион дар фазои иттилоотии кишвар ба рақобати ҷиддӣ мебарояд. Абдуқодири Абдуқаҳҳор, директори тозатаъини шабакаи мазкур дар сӯҳбат бо хабарнигори сомонаи «Рӯзгор» иброз дошт, ки акнун телевизиони «Пойтахт» умуман як телевизиони дигар мешавад.

Номбурда мегӯяд, ин шабака мутобиқ ба телевизиони қарни 21 шуда се омили асосӣ-иттилоот, фароғат ва маънавиёт, ки ҳоло телевизионҳои ҷаҳон аз руи ҳамин омилҳо фаъолият мебаранд, акнун «Пойтахт» низ бо риояи чунин  омилҳо кор мекунад: «Яъне мо ҳоло форматӣ телевизионамонро дигар кардем. Интизор меравад тақрибан баъди сад рӯз телевизиони «Пойтахт» аз дӯстдоштатарин шабакаҳои миллӣ шавад, ки мо вобаста ба ин масъала ниятҳои хеле ҷиддӣ дорем».

Абдуқодири Абдуқаҳҳор таъкид намуд, ки аз якуми январ ба спутник, ба моҳвора пайваст мешаванд, эҳтимол меравад, ки телевизиони «Пойтахт»-ро дар 50 давлатӣ дунё тамошо кунанд ва ҳадафи ниҳоии онҳо ба 5-умин шабакаи миллӣ табдил додани телевизиони «Пойтахт» мебошад.

Ин ҳамсӯҳбатамон таъкид намуд, ки тибқи як маниторинг, ки чанд рӯз пеш дар кӯчаи марказии шаҳри Душанбе гузарониданд, маълум шудааст, ки аллакай 30% бинандагони 4 шабакаи дигари давлатӣ ба телевизиони «Пойтахт» гузаштаанд.