АЗ МИЁНИ ҶАМЪИ МАРДОН МАРДИ БОЛО, РАФТ, РАФТ...
Рӯзи 22-уми ноябри соли 2012, баъд аз намози аср, дар масҷиди марказии ҷомеъи ноҳияи Қумсангир маросими хондани намози ҷанозаи домулло Муҳаммадӣ баргузор гардид. Тибқи тасмими аҳли байти эшон маросими ҷаноза бояд рӯзи 23-уми ноябр баъд аз адои намози ҷумъа барпо мешуд.
Вале бо дархости ҳукумати маҳаллӣ замони гузоштани намози ҷанозаи мавсуф тағйир дода шуд. Бо вуҷуди он ки бархе аз мардуми ҷумҳурӣ аз вақти дақиқи баргузории ҷаноза бехабар буданд, вале ба ин маросим аз тамоми гӯшаву канори ҷумҳурӣ ва ҳатто берун аз ҷумҳурӣ мардуми зиёде ҷамъ омаданд.
Мо ба чашми сар дидем, ки дар минтақаи наздик ба ҷои истиқомат ва масҷиди марказии ҷомеъи ноҳия аз ду самт тақрибан дар масофаи 6-7 километр аз ду тарафи шоҳроҳи Душанбе-Қумсангир ду қатори мошинҳои сабукрави гуногунтамға саф кашида буданд. Баъзе аз кормандони Бозрасии Давлатии Автомобилӣ теъдоди мошинҳои сабукравро дар ин ҳамоиш наздик ба дувуним се ҳазор адад тахмин мезаданд.
Дар омади гап бояд гуфт, ки кормандони БДА ва дигар ходимони вазорати корҳои дохила аз ӯҳдаи таъмини назму тартибот дар ин маросим хуб баромаданд. Ба қавле дар маросими намози ҷанозаи домулло Муҳаммадӣ беш аз 20 ҳазор нафар намозхон ширкат намуд. Қабл аз баргузории намози ҷаноза як теъдод аз шахсиятҳои мазҳабӣ азҷумлаи уламои кишвар ва инчунин раиси вилояти Хатлон Ғайбуллоҳ Афзалов аз минбари маҷлис суханронӣ намуда аз домулло Муҳаммадӣ ба неки ёд намуданд.
Ғайбуллоҳ Афзалов азҷумла гуфт, ки қабл аз он ки ба ин маросими ҷаноза биёяд Президенти кишвар Эмомалӣ Раҳмон бо ӯ телефонӣ дар тамос шудааст ва ба ӯ гуфтааст, ки таъзияи ӯро ба муносибати марги домулло Муҳаммадии Қумсангирӣ ба аҳли хонавода, пайвандон ва мардуми Тоҷикистон бирасонад. Раиси вилоят хизматҳои домулло Муҳаммадиро дар барқарории сулҳу субот дар кишвар бузург арзёбӣ кард.
Дар суханрониҳои домулло Ҳикматуллоҳи Тоҷикободӣ, эшони домулло Абдулбосир, писари эшони Абдураҳмонҷон, домулло Саидумари Ҳусайнӣ намояндаи мардумӣ дар Парлумони кишвар, муовини аввали раиси ҲНИТ, эшони Сайидҷон писари эшони Сорбон, сархатиби масоҷиди вилояти Хатлон, муовини раиси Шӯрои уламои Маркази Исломии Тоҷикистон ва дигарон хизматҳои шоёни ин донишманду мударриси бузург дар роҳи таҳкими пояҳои дини мубини ислом дар Тоҷикистони азиз мукарраран таъкид мешуд. Ҳамаи онҳо реҳлати ҷонгудози ин бузургворро талафоти ҷуброннашавандае барои дини ислом ва миллати тоҷик хонданд.
Дар ин маросими ҷаноза домулло Мирзо, собиқ хатиби яке аз масоҷиди аз Кӯлоб ва домулло Абдураҳим, собиқ хатиб дар масҷиди маҳаллаи Қазоқони шаҳри Душанбе низ ширкат варзиданд. Онҳоро мардуми ҷанозахон хеле гарму самимӣ истиқбол гирифтанд. Як иддаъ аз ҷавонон аз гардонандаи ин ҳамоиш эшони Сайидҷон хоҳиш карданд, ки ба домулло Мирзо низ имкони сухан гуфтан диҳад. Эшони Сайидҷон гуфт, ки бо сабаби он ки шояд ин суханронӣ ба табъи ҳукуматдорон нафорад ва ба шахсияти домулло Мирзо осебе расад, ӯ ин хоҳишро иҷро карда наметавонад.
Аз гуфтугӯйҳои мардуми ҷанозахон маълум мешуд, ки онҳо омадани уламои киром, бародарон Тӯраҷонзодаҳоро низ ба ин маросим бесаброна интизоранд. Вале бо сабабҳои номаълум бародарон Тӯраҷонзодаҳо дар ин маросим ширкат накарданд.
Наздикиҳои намози шом тақрибан беш аз 20 ҳазор нафар ширкаткунандаи ин маросим намози ҷанозаро таҳти имоматии домулло Ҳикматуллоҳи Тоҷикободӣ хонданд. Ҷасади домулло Муҳаммадӣ дар қабристони деҳаи Маданият ба хок супорида шуд.
Шоир Садриддини Вахширо дар доираи адибони ҷумҳурӣ шояд кам нафароне бошанд, ки бишносанд. Бале, ӯ шеъри кам мегӯяд, вале ирфонӣ. Баъди адои намози ҷаноза ӯ ба хабарнигори сомонаи «Рӯзгор» бо ашки чашму андӯҳи фаровон ин мисраъҳоро, ки ҳамон лаҳза эҷод кардааст, қироат намуд:
Ай дили нодон хабар дорӣ, ки доно рафт, рафт.
Аз миёни ҷамъи мардон марди боло рафт, рафт.
Қатра аз дарёи раҳмат буд андар ин диёр,
Шавқи васл омад магар, қатра ба дарё рафт, рафт.
Панду андарз беғараз медод хосу омро,
Ай дареғ, ин носеҳи ҳар пиру барно рафт, рафт.
Марги олим марги олам гуфтаи пайғамбар аст,
Ходими дини мубин аз дори дунё рафт, рафт.
«Рӯзгор»
