НАБИЮЛЛОҲ САЙИДОВИ 11-СОЛА ҚАҲРАМОНИ ФИЛМИ КОРГАРДОНИ АМРИКОӢ

Шабакаи телевизиони «HBO»-и Амрико аз рафти мусобиқаи байналмилалии ҳофизони Қуръони карим, ки ҳар сол дар моҳи мубораки рамазон дар Миср баргузор мешавад, филми мустандеро ба навор гирифтааст, ки он дар даҳумин ҷашнварои синамоии Ню Йорк «Троебко» ширкат хоҳад кард.

Ин филми мустанад дар бораи як бахше аз ҳаёти мусалмонон, ба хусус дилбастагӣ ва шавқу ҳаваси пайравони оини Муҳаммадӣ ба Қуръон, пардохта шудааст. Коргардони он, Грег Боркер, дар ин филм талош кардааст, то раванди ҷаҳду талош ва бедорхобии наврасони мусалмонро барои ҳифзи сӣ ҷузъи Қуръон, омодагӣ барои рақобатҳои Қуръонӣ ва хушхонии онон дар ин мусобиқаи байналмилалиро рӯи навор биорад.

Филми мазкур асосан дар бораи се кӯдаки мусалмони ғайриараб ва зодаи кишварҳои ғайриарабӣ нақл мекунад. Навраси ёздаҳсоли тоҷик, Набиюлло Саъидов, яке аз се чеҳра (персонаж)-и асосии ин филм аст, ки аз байни  110 навраси мусалмон аз 70 кишвари ҷаҳон интихоб шудааст.

Ба гузориши хабаргузории «iqna» филми мустанади «Koran by heart» (Қуръон аз умқи вуҷуд) бо мавзӯи мушоракати се кӯдаки ҳофизи Қуръон дар мусобақоти байналмилалии Қуръони Миср, тавассути “Greg Barker” Грег Боркар, коргардони амрикоӣ, тавлид шуд.

Дар ин филм раванди мушорикати се кӯдаки ҳофизи Қуръон дар мусобиқоти байналмилалии ҳифзи Қуръон дар Миср ба унвони яке аз рақобатҳои муҳимми Қуръонии ҷаҳони ислом ба тасвир кашида шудааст.

Коргардони филми «Қуръон аз умқи вуҷуд» дар ин бора гуфт: аз муддатҳо пеш мехостам филме дар бораи ҷаҳони ислом таҳия кунам, замоне, ки хабари баргузории рақобати Қуръонии Мисрро шунидам, рақобат дар он бароям ҷаззоб буд ва тасмим гирифтам филме дар бораи ин мусобақот бисозам.

Грег ҳамчунин қайд кард: «сохти филме дар бораи мусобиқаҳои Қуръонии кӯдакон дар он ширкат мекунанд, дунёи ҷадиде дар коргардонӣ пеши рӯи ман боз шуд».

Вай баён кард: «Бозигарони аслии филм се кӯдаки 10-сола аз нажодҳои мухталиф ҳастанд, ки аз кишварҳои хориҷ аз минтақаи Ховари Миёна интихоб шудаанд ва дигар шахсиятҳо низ ба тадриҷ дар ҳини филм интихоб шуданд».

Ин коргардони Амрикоӣ дар идома изофа кард: Рифоҳ  Рашид аз Молдев, ба унвони кӯчактарин иштирокчии мусобиқоти байналмилалии Қуръони Миср, Набиюлло Сайъидов кӯдаки ширкаткунанда аз Тоҷикистон ва Ҷамил Деҷенҷ шахсиятҳои аслии филми мустанади «Қуръон аз  умқи вуҷуд» ҳастанд, ки ҳунармандони хориҷ аз Ховари Миёна нақши ононро ифо мекунанд ва ман барои ин масъала хеле исрор доштам.

Грег бори дигар таъкид кард: «Ислом дар Амрико ба дурустӣ шинохта нашудааст, аммо дар Ховари Миёна вазъ фарқ мекунад ва ин дин ба унвони бузургтарин дини минтақа аст ва арабӣ забони Қуръон маҳсуб мешавад».

Номбурда бори дигар дар поён ёдовар шуд: «Ҷаҳон  яку ним миллиард мусалмон дорад, ду миллиони онон дар Иёлати Муттаҳидаи Амирко зиндагӣ мекунанд ва ислом дини ҷаҳонӣ ва ба ҳаққ аст».

Бар асоси ин гузориш, филми мустанади «Қуръон аз умқи вуҷуд» дар мусобиқаи филмҳои мусатанди даҳумин ҷашнвораи синамоии «Троебко» дар Ню Йорк ширкат  дода мешавад. Гуфтанист, мусобақоти байнулмилалии ҳифзи Қуръони Миср ҳар сол дар айёми моҳи мубораи рамазон бо ҳузури намояндагони кишварҳои мухталифи ҷаҳон дар ин кишвар баргузор мешавад.

Набиюлло Саъидов, кӯдаки ёзадаҳ солаи тоҷик номи мусалмонони кишвар ва Тоҷикистонро дар сатҳи ҷаҳонӣ дар ҳоле муаррифӣ мекунад, ки лоиҳаи Қонуни ҶТ «Дар бораи масъулияи падару модар дар таълиму тарияи фарзанд», ки баъд пешниҳоду баҳсҳои тӯлонӣ айни замон дар баррасии вакилон қарор гирифтааст, ҷалби кӯдакони то синни 18-соларо ба иттиҳодияи динӣ маҳдуд кардааст.

Ба гуфтаи Қорӣ Абӯбарки Муллоназар, аз шаҳри Қурғонтеппаи вилояти Хатлон, дар сурате, ки лоиҳаи Қонуни мазкур бо ҳамон шакли маҳдудсозии ҷалби кӯдакони то сини 18 ба иттиҳодияҳои динӣ ба тасвиб бирасад, дар ояндаи наздик мо чунин муаррификунандагони наврасро аз даст медиҳем ва табиъист, ки баъд аз синни 18-солагӣ ҳифзи Қуръон ба осонӣ ба даст намеояд. Чунки ҳофизаи инсон баъд аз балоғат расидан аксар маврид бо мушкилоти фикрӣ ва буҳрони аз худкунӣ рӯбарӯ мешавад.

Амруллоҳи Низом, «Рӯзгор»