САҲМИЯҲОИ «РОҒУН» БА ФУРӮШ БАРОВАРДА МЕШАВАНД

Ҳукумати Ҷумхурии Тоҷикистон имрӯз ҳамаи саъю кӯшишро барои ҳарчи зудтар ба фурӯш баровардани саҳмияҳои «Роғун» ба харҷ медиҳад.

Мутобиқи гузориши вазири молияи ҷумҳурӣ дар маҷлиси навбатии Ҳукумати ҷумҳурӣ саҳмияҳои НБО «Роғун» бо арзиши номиналии 100, 500, 1000 ва 5000 сомонӣ аз рӯзҳои аввали соли 2010 ба фурӯш бароварда мешаванд. Ташкилоту муассисаҳо ва шахсоне, ки бо маблағи беш аз 5 ҳазор сомонӣ харидорӣ мекунанд, соҳиби сертификати махсус бо сабти номашон мешаванд. Барои ин қоғазҳои қиматнок 4 дараҷаи муҳофизатидошта пешбинӣ шудааст, то чопи саҳмияҳои қалбакӣ пешгирӣ карда шаванд.

Саҳмияҳо тавассути бонкҳо, идораҳои молиявии Дастгоҳи иҷроияи Президенти Ҷумҳурии Тоҷикистон, вазорату идораҳо ва дигар ташкилоту муассисаҳо ба фурӯш пешниҳод мегарданд. Ҳамчунин С. Наҷмуддинов зикр кард, ки баъди ба кор даромадани нерӯгоҳ ва фоидаовар шудани он саҳмдорон аз фоидаи он баҳравар шуда, дар баробари ин ҳуқуқ доранд, ки саҳмияҳои худро бо нархи дилхоҳ ба хоҳишмандон бифурӯшанд ва ҳуқуқи харидории ин саҳмияҳоро танҳо шаҳрвандони Тоҷикистон доранд.

Роҳбарони як қатор вазорату идораҳо, ташкилоту муассисаҳо ва соҳибкорони сершумор, ки дар ин ҷамъомад иштирок доштанд, ба харидорӣ аз ин саҳмияҳо изҳори омодагӣ карданд ва таъкид доштанд, ки омодаанд ба хариди саҳмияњои нерӯгоҳи Роғун маблағҳои калон равона созанд.

Аз рӯи иттилои вазорати молияи ҷумҳурӣ саҳмияҳои ҶСК НБО-и «Роғун» дар ду шакл бароварда мешаванд. Яъне, саҳмияҳои ҳуҷҷатӣ бо арзиши номиналии 100, 500, 1000 ва 5000 сомонӣ, ки дар тарафи пеши он номи ҶСК НБО-и «Роғун», арзиши номиналии саҳмия, нишонии Ҷумҳурии Тоҷикистон, расми сарбанд, обанбор ва ҷоришавии об, хатти интиқоли барқ, рақам ва силсилаҳои саҳмия, дар тарафи қафои он бошад, шартҳои барориши саҳмия дарҷ гардидааст. Саҳмияҳо чор дараҷаи муҳофизатӣ доранд, микротекст, яъне матни дида нашаванда, чопи ноаён, қоғази ҳимояшаванда, чопи линзоветӣ, яъне бо асбоби махсус дида мешавад.

Сертификати саҳмияҳо бошад, ғайриҳуҷҷатӣ буда, хариди онҳо аз тарафи вазорату идораҳо, ташкилоту муассисаҳо ва корхонаҳои давлатӣ, инчунин аҳолие, ки аз 5000 сомонӣ зиёд харидорӣ менамояд, амалӣ гардида, аз ҷониби Вазорати молия таввасути номнависӣ ба қайд гирифта мешавад.  Афзалият ва ҷолибии саҳмияҳои НБО-и «Роғун» ва ҳуқуқи саҳмдорони он, пеш аз ҳама дар он аст, ки саҳмдорон метавонанд баъди ба истифода додани агрегатҳои аввали он дар мӯҳлати наздик аз фоидаи он дивиденд, яъне даромад гиранд.