Роғун

ГУЛ ШЕРАЛӢ ДАР БОРАИ ТАВАҚҚУФИ УМУР ДАР 'РОҒУН' 'ҲЕЧ ИТТИЛОЕ НАДОРАД'

Вазири энержӣ ва саноеъи Тоҷикистон дар бораи умури сохтмонӣ дар нерӯгоҳи Роғун ва таътили беш аз 5 ҳазор нафар коргар дар он макон иттилоъе дар даст надорад. Ин нукта рӯзи душанбеи 23 июл, дар нишасти хабарии Гул Шералӣ, вазири энержӣ ва саноеъи Тоҷикистон иброз шуд.

Иструон Истивенсун, намояндаи порлумони Урупо, дар як нишасти хабарӣ дар шаҳри Душанбе дар ҳафтаи гузашта гуфта буд, ки бо тақозои Бонки Ҷаҳонӣ умури сохтмонӣ дар "Роғун" маҳдуд шуда ва беш аз 5 ҳазор нафар коргари ин тарҳ бекор мондаанд.

Ба гуфтаи вазири энержӣ ва саноеъ умури сохтмонӣ дар нерӯгоҳи обии Роғун таҳти назорати нахуствазири Тоҷикистон қарор дорад. Зеро дар Тоҷикистон гурӯҳи вижаи назорат бар сохтмони тарҳҳои энержии обӣ таъсис шуда ва раёсати он ба уҳдаи Оқил Оқилов, нахуствазири Тоҷикистон, вогузор шудааст.

Аз ин лиҳоз ӯ дар бораи раванди сохтмон, мутаваққиф шудани корҳои сохтмонӣ ва бекор мондани беш аз 5 ҳазор коргар аз нерӯгоҳи Роғун иттилоъи дақиқе дар даст надорад. Вале Гул Шералӣ ба таври мушаххас нагуфт, ки Вазорати энержӣ ва саноъеи Тоҷикистон дар бунёди нерӯгоҳи Роғун, ки давлат онро тарҳе роҳбурдӣ (истротежик) хондааст, чи нақше дорад.

Ин дар ҳолест, ки ба навиштаи расонаҳои гурӯҳии Тоҷикистон, дар авохири ҳафтаи гузашта Гул Шералӣ ва Оқил Оқилов аз маҳалли сохтмонӣ нерӯгоҳи Роғун дидан кардаанд. Гузашта аз ин, ду ҳафта қабл шабакаҳои давлатии телевизиюни Тоҷикистон аз сафари Президент Раҳмон ба маҳалли сохтмони "Роғун" гузориш дода ва чеҳраи Гул Шералӣ дар канори раиси ҷумҳури Тоҷикистон намоён буд.

Дар ҳоле ки намояндаи порлумони Урупо аз маҳдуд шудани умури сохтмонӣ дар "Роғун" ва бекор мондани беш аз 5 ҳазор нафар коргари ин нерӯгоҳ ба расонаҳо иттилоъ медиҳад, баъид ба назар мерасад, ки вазири энержӣ ва саноеъи Тоҷикистон аз раванди умури сохтмонӣ дар ин нерӯгоҳ иттилоъе надошта бошад. Аммо то ҳол, мақомоти Тоҷикистон дар мавриди таваққуфи бархе умур дар "Роғун" ибрози назаре накардаанд.

Ҳамзамон, вазири энержӣ ва саноеъи Тоҷикистон дар нишасти матбӯъотии рӯзи душанбе хабар дод, ки 19 июли соли ҷорӣ ду нафар аз бозрасони байналмилалии тарҳи "Роғун" ба Тоҷикистон омада ва қарор аст чанд нафари дигар имрӯз вориди шаҳри Душанбе шаванд. Интизор меравад ин гурӯҳ фардо барои ошноӣ бо корҳои сохтмонӣ ба маҳалли эҳдоси нерӯгоҳи "Роғун" сафар кунанд.

Ба ин тартиб, ҳадс зада мешавад, ки бозрасони тарҳи "Роғун" фаъъолияти худро азсар хоҳанд гирифт. Дар гузашта манобеъи Би-би-сӣ изҳор доштанд, ки ин бозрасҳо дар пайи ихтилофи назарҳо бо давлати Тоҷикистон ин кишварро тарк кардаанд.

Тибқи тавофуқот миёни давлати Тоҷикистон ва Бонки Ҷаҳонӣ ин муассисаи молии байналмилалӣ тарҳи бозрасии мустақилли "Роғун"-ро сармоягузорӣ мекунад. Давлати Тоҷикистон дар пайи фишорҳои кишварҳои поёноб ба бозрасии мустақилли тарҳи сохтмони нерӯгоҳи "Роғун" омода шуд.

Гул Шералӣ дар нишасти мутбӯъотии рӯзи душанбе гуфт: “Ҳайъати Бонки Ҷаҳонӣ пас аз ошно шудан бо корҳои сохтмонӣ дар нерӯгоҳи Роғун ба ҳукумати Тоҷикистон тавсияҳои худро дар бораи ихтисор кардан ё накардани коргарони сохтмони Роғун пешниҳод мекунад.”

Аз сӯйи дигар, оқои Шералӣ гуфт, ба иллати камбуди муштариёни нерӯи барқ дар фасли тобистон нерӯгоҳҳои Тоҷикистон наметавонанд бо тавоноии комил фаъъолият кунанд ва маҷбур ҳастанд бахше аз оби саддҳоро ба рудхонаҳо партоб кунанд.

Ба гуфтаи ӯ, феълан Афғонистон танҳо воридкунандаи нерӯи барқи тавлиди Тоҷикистон маҳсуб шуда ва ҳамарӯза аз тариқи хатти барқӣ аз Сангтӯдаи Тоҷикистон ба вилоёти Кундузу Бағлони Афғонистон 195 меговот нерӯи барқ содир мешавад.

Гуфта мешавад, Тоҷикистон имкон дорад мизони судури нерӯи барқ ба Афғонистонро то 600 меговот дар як рӯз афзоиш диҳад, аммо хутути барқи Афғонистон имкони интиқоли ин миқдор нерӯи барқро надорад.

Ин дар ҳолест, ки ба гуфтаи масъулони Вазорати энержӣ ва саноеъи Тоҷикистон, феълан шаҳри Кобул ҳамарӯза ба 100 меговот ва шаҳри Қандаҳор, дар ҷануби Афғонистон ба 400 меговот ниёз дошта ва Тоҷикистон метавонад дар фасли тобистон ин ниёзҳоро бароварда кунад.

Би-Би-Си