Ин сойт матолибе дар бораи зиндагӣ ва фаъолиятҳои эшони Тураҷон ва ин се писараш, ки ҳоло аз рӯҳониёни саршинос маҳсуб мешаванд, ва ҳамчунин суолу ҷавобҳое дар бораи ислом ва фарҳангу адабиёти исломӣ, видию ва тасовире аз онҳоро дар бар дорад. Мубтакирони ин сойт хитоб ба дидоргарон менависанд, ки "Худованд моро муваффақ гардонда, ки бо истифода аз технологияи замона" байни мардум ва "бузургони ин миллат, абармардони ҷасуру ҷонфидои ислом" як пули иртиботӣ барпо кунанд.

Сипас дар ин матлаб, ки "Сухани Идора" унвон дорад, ба душвории иртиботи "беш аз як милюн бародарони мусалмони мо, ки дар хориҷ аз ватан дар шароити душвор дар пайи рӯзии пайвандонашон ҳастанд", ишора шуда ва омадааст, ки ин сойт барои посух додан ба масоили рӯзмарраи муҳоҷирон ва "роҳи ҳалли исломии" ин масоил василаи муҳимме аст.

Дар ин сойт ҳамчунин омадааст: "Мутаассифона, васоили ахбори омма аз телевизиюну родию то рӯзномаҳо ин ҳуқуқҳоро то андозае аз мусалмонони кишвар салб намудааст."

Муаллиф меафзояд: "Аз ҳамин ҷиҳат мо ба андозаи қудратамон кӯшидем, то як сомонаи (Сайти) интернетии хос бо иштироки ин хонадони бузурги кишварамон, хонадони Ҳазрати Эшони Тураҷон (раҳимаҳуллоҳ) бунёд кунем. То ки хидмати кӯчаке ҳам бошад, дар роҳи шиносоӣ бо ин абармардон ва ошноӣ бо дидгоҳҳои эшон ва осору таълифоташон дошта бошем."

Гардонандагони вебСайти хонадони Тураҷонзода ҳадафҳои худ аз таъсиси ин сойтро шиносоии наздик бо хонадони эшони Тураҷон, пахши осор ва таълифоти онҳо, саҳмгузорӣ дар "бедории рӯҳ ва маънавиёти исломии мардуми бузурги тоҷик аз роҳи пахши наворҳои исломии эшон", мехонанд.

Ҳамчунин, тарбияти насли ҷавони кишвар дар руҳияи ахлоқи ҳамида, таҳаммулпазирӣ, огоҳии исломӣ ва "дурӣ аз зиштиҳову палидиҳо ва ғарбзадагӣ", расондани посухи бародарон Тураҷонзода ба суолот ва масоили фиқҳӣ, шиносоӣ бо фарҳанг ва адабиёти исломӣ, ироаи ахбори муҳимми исломӣ, ва ғайра низ аз ҷумлаи ин аҳдоф будааст.

Охирин ҳадафе, ки дар ин матлаб дарҷ шуда, ба масоили занон муртабит аст: "Баёни масъалаҳои марбут ба зани мусалмон, ҳиҷоб ва покдоманӣ ва ғайра аз дидгоҳи бузургон (яъне бародарони Тураҷонзода)".

Ҳарчанд дар гузашта сойтҳо ва веблогҳое перомуни ислом ва шахсиятҳои исломӣ дар Тоҷикистон вуҷуд дошта, вале ин нахустин бор аст, ки як Сайти хонаводагии рӯҳониёни саршинос дар ин кишвар роҳандозӣ мешавад. Акбари Тӯраҷонзода, узви пешини порлумон ва ду бародараш Маҳмудҷон ва Нуриддинҷон аз нуфузи густардае дар миёни мусалмонони Тоҷикистон бархурдор будаанд ва ҳазорон нафар аз саросари кишвар рӯзҳои ҷумъа барои адои намоз ба масҷиди ноҳияи Ваҳдат мераванд, ки ба ин хонадон мутаъаллиқ аст.

Ба ҷуз Акбари Тураҷонзода, ки лақаби "ҳоҷӣ" ба номаш маъмулан изофа мешавад, ду бародари дигараш монанди падарашон худро "эшон" меноманд. Эшон дар фарҳанги исломии Осиёи Миёна ба табақае аз рӯҳониён гуфта мешавад, ки аз дониши зиёди мазҳабӣ ва аз нуфуз дар миёни мардум бархурдоранд.

Би-Би-Си

Адреси доимии маводи мазкур: http://www.ruzgor.tj/din/2370-2010-05-27-11-53-47.html