"Рӯзгор" нобиғаҳои олами адабро низ муаррифӣ кунад

Дуруд ба ҳамаи азизони хонанда. Аввалин суоли ҳафтаи сипаришуда ба "Рӯзгор" то ҳадде ғайримунтазира буд. Хонандаи доимии мо аз ноҳияи Абдураҳмони Ҷомӣ Муҳаммадраҷаб Оқилов мепурсид, ки истилоҳи одами хубу бадро шарҳ диҳем. Яъне, киро метавон хуб гуфт ва киро бад. Ростӣ ин як суолест, ки посухи доманадор мехоҳад. Ва дар як саҳифаву ду саҳифа наметавон ҷавоб дод ва хонандаро қонеъ кард. 

Вале посухи кутоҳ ин аст, ки инсони комил ва хуб он аст, ки аз вуҷудаш ҷомеа, хонавода, атрофиён ва дӯстон ҳаловат мебаранд. Инсони хуб мисли мушкест, ки аз он ҳамеша бӯи хуш меояд, рафтораш, нишасту хесташ, суханонаш хубанд, лаҳни гуворои суҳбат дорад, дилхарош нест, мулоим ва ҳалиму меҳрубон аст. Дӯстонашро дӯст медорад, ба одамон пайваста некӣ мекунад. Ва худи Муҳамадраҷаб низ ин гуна одамонро дар атрофаш мушоҳида мекунад.

Инсонҳои бад касонеанд, ки ҳама аз вуҷудашон безоранд. Дағал, моҷароҷӯ, ғайбатчӣ, дурӯғгӯ, иғвогар...Инҳо низ худ мушаххасанд. Дар муносибат бо ин гуна шахсон одамон хеле эҳтиёткоранд. Мегӯянд аз одами бад ҳазар бояд кард, ки шарраш нарасад. Хайр, ки надорад, аз шарраш бояд эҳтиёт кард.  

Номаҳое, ки дар ин шумора истифода шудаанд, дар вақту замони гуногун расидаанд ва мо онҳоро нигоҳ дошта будем, то дар мавриде якҷо истифода кунем. Зеро ин номаҳо пешниҳоду дархост ва эродҳоянд. Аз номаи Садбарг сар мекунем, ки пазмони маҳфили "Ҳамешабаҳор" шудааст.

Саҳифаи "Ҳамешабаҳор" куҷо шуд?

Ман дар гузашта яке аз ширкаткунандагони фаъоли маҳфилҳои адабии шоири хуби мо Хайрандеш дар шаҳри Қурғонтеппа будам. Он замон ин маҳфилҳо бо номи "Хайрандеш" амалӣ мешуданд. Баъдан Хайрандеш аз Қурғонтеппа ба Душанбе кӯч баст ва маҳфилашро ҳам "Ҳамешабаҳор" ном кард. Ман чун даҳҳо нафари дигар аз ширкат бинобар дурии роҳ маҳрум шудем.

Вале хуш будам, ки пайваста аз тариқи "Рӯзгор" аз ин маҳфил огоҳ мешудам ва ашъори ширкаткунандагонашро ҳам мехондам. Мутаассифона, ҳар шодӣ интиҳое доштааст ва ҳоло мебинам, ки чанд шумора ба инҷониб "Ҳамешабаҳор" дар "Рӯзгор" чоп намешавад. Шояд маҳфил қатъ шуд ё матлаби он интишор намешавад. хулоса барои мо номуайян аст. Мехостам донам, ки сабаб чист?

Садбарг, Қурғонтеппа

"Рӯзгор": Дар ҳақиқат чунин аст, яъне чопи "Ҳамешабаҳор" муддатест қатъ шудааст. Аммо на бо гуноҳи мо. Балки мутасаддиёнаш маводҳоро чанд муддат ба инҷониб пешниҳод намекунанд. Сабабшро худи мо ҳам намедонем. Аммо чун шумо суол кардед, ҳатман аз Хайрандеш мепурсем ва посухашро дар шумораи оянда чоп мекунем. Вале ҳоло ду матлаб тақрибан дар ин мавзуъ дорем, ки дар саҳифаи 14 метавонед мутолиа кунед.

Мехоҳам доктор Абдуллоҳ президенти Афғонистон шавад

Интихоботи Афғонистон ҳам баргузор шуд, аммо намедонем кӣ пирӯз асту кӣ мағлуб. Ман ҳамеша аз доктор Абдуллоҳ пуштибонӣ мекардам. Медонед чаро?

Ман аслан ин марди Худоро намешиносам, аз наздик надидаам. Вале аз тариқи маҳвора дар телевизионҳои афғонӣ мебинам. Хуб суҳбат мекунад. Симои басо тоҷикона дорад. Босавод аст, маълум, ки боадаб ва ашрофзода аст.

Аз сӯи дигар дӯст дорам, ки ӯ президент шавад. Ва агар ӯ бошад ба гумонам ормонҳои Масъуду Раббонии шаҳид зинда мешаванд. Зеро доктор ҳам шогирдони ин ду тан буд.

Ва ниҳоят: мо тоҷикон муддате нони бародарони афғониро хӯрдаем ва ба поси хотири намак мехоҳем ин кишвари ҳамсоя, ҳамзабон ва ҳамдин босуботу обод бошад. Мехоҳем ба ҷанг хотима диҳанд, мехоҳем инсоният боло гирад ва Афғонистони азиз рӯ ба рушд орад.

Муҳаммадсафо Қодиров, Вахш

"Рӯзгор": Ин орзуи ҳар фарди озода аст. Оромиву суботи Афғонистонро мо ҳама мехоҳем. Интихобот баргузор шуд, мардуми Афғонистон райъи худро доданд ва шумориши оро идома дорад. Ҳоло гуфтан барвақт аст, ки ғолиб киву мағлуб кӣ. Умед мекунем ин бор мардуми Афғонистон дар интихобашон иштибоҳ накунанд. Зеро дар ин марҳилаи сарнавиштсоз ин кишвар ниёз ба як роҳбаре дорад, ки зери ливои ваҳдат ҳама гуруҳҳоро муттаҳид созад. Саҳнаҳои интихобот ва ширкати фаъолонаи мардумро шумо дар саҳифаи 7 "Рӯзгор" метавонед мурур кунед.

Нобиғаҳои адабиёти оламро муаррифӣ кунед

Ман 4 моҳ шуд бо "Рӯзгор" ошноям. Ҳар ҳафта мехонам. Шояд дурӯғ гуфта бошам. Баъзан пайдо намекунам. Вале ба гумонам зарфи ин чор моҳ аксари шумораҳояшро хондаам.

Чизе ки ман мехоҳаму намеёбам ин маълумот дар бораи шинохтатарин адибони муосири олам аст. Ман дӯстдори адиби шинохтаи колумбӣ Габриэл Маркес ҳастам. Мехостиам дар боари ӯ матлаб бихонам. Мехостам зиндагиномаи Ҷек Лондон ва Хеменгуейро бидонам. Ҳаёти ин ду адиби барҷаста пур аз фоҷеаҳо буд. Ман ҳамагӣ як маротиба "Мартин Иден"-ро хондаам, вале бо гузашти 3 даҳсола ҳам ҷузъиёти онро фаромӯш намекунам.

Меҳоҳам дар бораи Сервантес бидонам…Умуман зиёданд хостаҳои дил. Гумон мекунам агар гӯшае боз шавад ва нобиғаҳои олами адаб муаррифӣ шаванд, хеле хуб хоҳад буд.

Носир Шоҳинҷонов, Панҷакент

"Рӯзгор": Пешниҳоди хуб аст. Талош хоҳем кард дар наздиктарин фурсат ин хостаро ба ҷо орем. Ва агар тасмим гирифтем, ки гӯшаеро ихтисос хоҳем дод, шуморо огоҳ мекунем. Бо мо бошед!

Чаро матлаби ояндаи худро пешакӣ муаррифӣ намекунед?

Ман танҳо як хонандаам, рӯзноманигор нестам ва намедонам кореро чӣ гуна метавон крад. Вале бо вуҷуди ин суол ва пешниҳод дорам: Чаро шумо наметавонед баъзе матлабҳои ҷолибро пешакӣ эълон кунед, то хонандаатон мунтазир бошад?

Ва пешниҳоди ман ин аст, ки ин корро кунед. Масалан, порае аз матлаберо оред ва гӯед, ки он кай чоп хоҳад шуд. Ба гумонам кори хуб мешавад. Хонанда мунтазир мешавад, ки кай онро мехонад.

Саодат Холмирзоева, Ёвон

"Рӯзгор": Ташаккур ба хонандаи азизамон Саодат Холмирзоева, ки ҳам эрод гирифтаанд ва ҳам пешниҳод кардаанд. Ин албатта, чандон мушкил надорад. Дар ҳоле, ки мо пешакӣ медонем шумораи навбатӣ дарбаргирандаи кадом матолиб хоҳад буд. То ин замон сари ин масъала наандешидем, вале акнун мекӯшем дархости шуморо амалӣ созем.

Бознашр аз ҳафтаномаи «Рӯзгор» №14, 09 апрели соли 2014