Шаҳсутуни парчами давлатии Тоҷикистон баландтарин дар ҷаҳон хоҳад буд

Сохтмони шаҳсутуни парчами давлатии Тоҷикистон, ки  баландтарин дар ҷаҳон хоҳад буд, дар арафаи анҷомёбист.  Бунёди онро ширкати амрикоии «Кампани трайдент супор» ба ӯҳда гирифтааст. Он  дар шаҳри Душанбе дар панҷсадметрии Қасри Миллат қомат меафрозад. Ин шашумин шаҳсутуне хоҳад буд,  ки ин ширкати амрикоӣ  онро дар тӯли фаъолияти худ бунёд мекунад.

Қаблан чунин шаҳсутунҳо дар Ҳабашистон, Урдун, Амороти Муттаҳидаи Араб, Туркманистон ва Озарбойҷон бунёд шудаанд. Шаҳсутуни парчами давлатии Тоҷикистон баландтарин флагшток (шаҳсутуни парчам) дар ҷаҳон хоҳад буд. Тибқи нақша парчами Тоҷикистон бояд дар нӯги ин шаҳсутун дар  баландии 165 метр партавафшонӣ кунад.  Ин шаҳсутун аз лӯлаҳои ба ҳам часпондашуда, ки ҳар кадом 12 метрӣ дарозӣ доранд, сохта мешавад.

Дар  қисмати поёнӣ диаметри ин шаҳсутун ё худ лӯлаҳо  каме бештар аз чор метрро ташкил медиҳад. Дар нуқтаи баландтарини он бошад диаметри шаҳсутун  аз як метр беш нест. Ба қуллаи ин шаҳсутун тавассути  зинапояҳое, ки дар дохили лӯлаҳо кафшер шудаанд, баромадан мумкин аст. Парчамро бошад тавассути генератор ба нӯги шаҳсутун мебардоранд.

Ба гуфтаи сохтмончиён парчами Тоҷикистон дар фарози ин шаҳсутун аз дилхоҳ нуқтаи шаҳр намоён хоҳад буд. арор аст расми ба истифода додани ин шаҳсутуни парчами давлатии Тоҷикистон дар рӯзҳои  таҷлили  20-солагии Иди истиқлолияти давлатӣ дар аввалҳои сентябри соли ҷорӣ баргузор гардад.

Хабарнигори сомонаи «Рӯзгор» ба маҳали сохтмони ин иншооти ҷашнӣ рафта аз рафти бунёди ин шаҳсусутун бо усули чандрасонаӣ гузорише таҳия намудааст, ки  инак он пешкаши муштариёни арҷманди сомонаи «Рӯзгор» мегардад.

«Рӯзгор»