Дар ин ҳамоиш, ки дар толори ҷаласоти ҳукумати вилояти Хатлон дар шаҳри Қурғонтеппа баргузор шуд, Лутфия Роибова, як масъули раёсати маъорифи вилояти Хатлон, гуфт рӯз то рӯз саффи кӯдаконе, ки ба масоҷид мераванд ва ё дар назди рӯҳониён сабақи исломӣ мегиранд, зиёд шудааст. Хонуми Роибова ҳушдор дод, ки ин раванд паёмадҳои ногуворе ба дунбол хоҳад дошт:   " Кӯдакони то синни мактабӣ ва мактабхонҳо дар саффи намозгузорон дида мешаванд, дар хонаҳои шахсӣ ба омӯзиши таъолими исломӣ саргарманд, ки ин амр метавонад онҳоро аз омӯзишу парвариш дур созад."

Вай ҳамчунин иброз дошт, ки бисёре аз рӯҳониёне, ки ба кӯдакон таъолими исломӣ медиҳанд, дар зеҳни кӯдакон хурофотпарастиро густариш медиҳанд. Лутфия Роибова афзуд: "Ҳар кӯдаке, ки назди муллоҳо сабақ мегирад ё ба масҷид меравад, баъди шунидани амри маъруфи имомону устодонашон аз мактаб канор мемонанд. Мо дар масҷидҳо минбаъд назоратро тақвият мекунем ва аз вуруди кӯдакон ба масоҷид ҷилавгирӣ мекунем."

Аммо рӯҳониён ва намояндагони дин дар вилояти Хатлон бо ин иқдоми мақомоти давлатӣ дар вилоят ибрози мухолифат карданд. Онҳо гуфтанд, ки 93 дарсади ҷамъияти Тоҷикистон пайравони дини исломанд ва набояд дар ин маврид бетараф буд. Эшони Саидҷон Маҳмудзода, раиси шӯрои уламои исломии вилояти Хатлон, гуфт, ки кӯдакон бояд намоз гузоранд ва сабақи исломӣ бигиранд. Вай афзуд: "Кӯдаконе, ки ба масоҷид мераванд, берун аз дарси мактаб онҷо мераванд ва ҳоло, ки таътили тобистона аст, саффи онҳо дар масоҷид зиёд шудааст, ки ба фикри банда, ин ҳеч зиёне надорад. Онҳо танҳо намоз гузошта ва сипас ба хона бармегарданд."

Оқои Маҳмудзода иддаъои хурофотӣ шудани кӯдакон дар масҷид ё дар хонаи рӯҳониён ба ҳангоми сабақгириро бепоя хонд. Вай гуфт: "Дар масоҷид муллоҳои мо ба кӯдакон амри маъруф ё таблиғоти дигаре намекунанд. Вале аз чи бошад, ки мақомот ин гуна тасмим гирифтаанд. Мо бо иқдоми онон мувофиқ нестем. Аз нуқтаи назари ислом ва шариъат ман ва дигар рӯҳониён наметавонем кӯдакеро, ки бо пойи таҳорат вориди масҷид мешавад, аз он ҷо пеш кунем."

Аммо мақомоти пулиси вилояти Хатлон мегӯянд, ки бештари сархатибони масоҷиди вилоят дар Ҳиндустону Покистон ва кишварҳои арабӣ таълимоти исломиро фаро гирифта, сабақи гирфтаашонро ба наврасону ҷавонон таблиғ мекунанд, ки ин амр паёмадҳои нохуше ба дунбол хоҳад дошт. " Як маъмури пулис, ки аз бурдани номаш худдорӣ кард, бо ишора ба мавориди боздошт ва муҷозоти ҷавононе, ки ба Салафия, Ҳизбуттаҳрир, Ҷамоъати таблиғ ва гурӯҳҳои дигари исломӣ пайвастаанд, гуфт, ки бештари ин афрод баъди таҳсил дар кишварҳои исломӣ ба узвияти гурӯҳҳои ифротгаро пайвастаанд."

Ба гуфтаи ин маъмури пулис, бештари афроде, ки ба ҷурми узвият дар ин гурӯҳҳо зиндонӣ шудаанд, ба таблиғи ҷавонону наврасон барои пайвастан ба гурӯҳҳои ифротгарои мазҳабӣ машғул буданд. Ба гуфтаи масъулони давлатӣ, ширкати кӯдакон дар намозгузориҳо дар масоҷид бештар дар шаҳрҳои Кӯлобу Қурғонтеппа ва навоҳии Ҷалодиддини Румӣ, Қумсангиру Бохтар мушоҳида шудааст. Дар ҷаласаи рӯзи ҷумъа мақомоти пулис ва намояндагони ниҳодҳои дигари давлатӣ аз шӯрои уламои исломии вилояти Хатлон хостанд, ки барои роҳ надодани кӯдакон ба масоҷид ва сабақгирӣ дар назди муллоҳо ба мақомот кумак кунанд.

Вале масъулони шӯрои уламои исломии вилояти Хатлон ва рӯҳониёни дигари маҳаллӣ ин пешниҳодро, азбаски ба гуфтаи онҳо оҳанги фармоишӣ дорад, напазируфтаанд. Дар ҳоле ки ихтилофи назари мақомҳои давлатӣ ва рӯҳониён рафъ нашудааст, маъмурони пулис мегӯянд, ки ба анҷоми амалиётҳои вижа барои дур кардани кӯдакону наврасон аз масоҷид идома хоҳанд дод.

Орзӯи Карим, Би-Би-Си

Адреси доимии маводи мазкур: http://www.ruzgor.tj/din/2649-2010-07-10-13-31-13.html